Sábadu, 23 Setembru 2017 | Login
Presidente PD, Assanami Presidente PD, Assanami

PD: Turiskai sei Sai sidade Francisco Xavier-Nicolau Lobato Featured

TURISKAI: Prezidente Partidu Demokrátiku (PD) Mariano Asanami Sabino Promete ba Povu Turiskai katak, sei harii sidade espesiál iha Avó Xavier nia rai moris fatin no fatin ne'ebé mak Nicolau Lobato hakotu iis bá.

Asanami dehan, Turiskai hanesan rai istóriku ne'ebé nia naran boot tebes iha mapa Timor-Leste.

Tanba rai ne’e produs  lider istóriku ne'ebé sai hanesan manu aman ba rai Timor hodi deklara no deside vida nasaun ne’e iha tempu difisil nia laran.

Tanba ne’e maka iha PD ninia kompromisu katak, Turiskai merese atu halo tratamentu espesiál.

Turiskai iha suku Sanulu resin ida (11), Foin suku haat maka hetan eletrisidade, suku haat seidauk asesu ba estrada no rua iha ona estrada ho eletrisidade maibé seidauk ho alkatraun.

Tanba ne’e PD nia kompromisu ba Turiskai oan sira hakarak dezenvolve sai sidade turístiku espesiál  ba Avó Xavier do Amaral no Nicolau Lobato. 

Bainhira PD ukun, Turiskai sai sidade Avó Xavier ho Nicolau Lobato tanba Avó Xavier sai Prezidente Primeiru Timor Leste  no Nicolau Lobato sai Prezidente Segundu.

Asanami dehan, PD hakarak atu halo Turiskai sai postu administrativu espesiál ba Avó Xavier no Nicolau Lobato.

Assanami dehan lia hirak ne’e ba militante PD  bainhira hala'o kampaña polítiku iha postu Turiskai, Kuarta (28/06).

“Husi fatin ida ne’e, fatin moris ita nia Prezidente primeiru Francisco Xavier do Amaral ne’ebé maka ohin la iha ona ita nia leet. Nia avó ida iha nia vida joven tomak  deklara hamutuk ho lider lubuk ida, hamutuk ho Nicolau Lobato deklara Timor Leste sai nasaun Demokrátiku iha dia 28 de Dezembru okupasaun Indoneziza” dehan Asanami.

PD Lakohi Lori Osan Eduka Povu

Alende ne’e, PD hanesan partidu kontinuador lakohi lori osan atu eduka povu. Maibé hakarak lori polítika no programa partidu nian hodi eduka povu iha kampaña eleitorál atu sira bele hatene lala'ok demokrasia iha Timor Leste.

Prezidente Consellu Polítika Nasionál (CPN) Adriano do Nascimento hateten, hanesan ema polítiku iha kampaña eleitorál  mai atu halo kompromisu polítiku ho militante no simpatizante.

Simpatizante no militante sira ne'e  atu rona programa hodi nune'e iha eleisaun  vota ba partidu ne'ebé  iha hanoin atu halo dezenvolvimentu ba povu nia moris di'ak.

Nia hatutan, iha tempu eleisaun partidu polítiku ne'ebé  iha forsa finanseiru dala ruma lori osan mai habosok povu sira  hodi vota ba sira nia partidu ne'ebé mak la iha planu polítiku no programa ba konstrusaun estadu.

Tanba ne’e militante ho simpatizante nune’e mós ba povu eleitór tomak atu bele kuidadu ho parpol sira ne'ebé lori osan sosa votu ne’e, Adriano husu depois de kampaña.

Nia dehan tan, bainhira  partidu polítiku sira lori osan mai, povu sira  simu tiha maibé lalika vota ba sira.

Adriano husu atu vota ba PD tanba PD mai la'ós atu sosa votu, PD mai atu eduka inan aman sira, la'ós mai hanorin povu ho osan,  lakohi sosa povu nia dignidade, lakohi sosa povu nia kiak ho osan iha tempu eleisaun.

“Tanba ne’e ha'u husu ba imi, kuandu ema balun mai ho osan simu de'it, tanba sira lori osan estadu nia maka mai, imi simu ba maka labele vota ba sira”, dehan Adriano.  

Read 415 times
Rate this item
(0 votes)

About Author

  • MidAd1
  • Heineken Klaran
AdBottom1