Partidu Republikanu Promete Dezenvolve Área Turizmu no Loke Kampu Servisu Featured

By Abril 19, 2018 1210
Presidente PR Joao Saldanha Presidente PR Joao Saldanha

DILI: Partidu Republikanu (PR) liu husi kampaña ho modelu diálogu iha Munisípiu Vikeke, Postu Administrativu Watulari, Suku Vesoru, promete ba povu hodi dezenvolve área turizmu Timor-Leste no mós loke kampu servisu ba joven sira.

Diálogu ne'e lidera husi Prezidente PR, João Mariano Saldanha, akompaña husi Vise-Prezidente, Vicente Vias da Costa, Vise-Sekretáriu Jerál, Venâncio Sarmento no Prezidente Juventude Republikanu (JR), Joel R.M. Casimiro.

João husu ba povu Vikeke vota ba PR hodi hadi'a infraestrutura, dezenvolve área turizmu, loke kampu servisu ba juventude sira.

Programa ne'ebé PR realiza ona maka hanesan uma moris di'ak, kréditu republikanu, bisnis republikanu, bee moris di'ak, saúde republikanu, edukasaun ho kualidade”, tenik nia, iha diálogu ho komunidade Vesoru-Vikeke, Segunda (16/4).

Nia hatutan, PR mós iha polítika atu eleva investimentu seluk ne'ebé sai prioridade ba dezenvolvimentu nasionál, tanba tempu to’o ona atu hadi'a dezenvolvimentu liu husi planu estratéjiku dezenvolvimentu (PED) 2011-2030.

PR hahú halo daudaun uma moris di'ak, kréditu moris di'ak ka kréditu republikanu, bisnis republikanu PR hahú halo ona.

Iha fatin hanesan, Koordenadór Republikanu Suku Vesoru, Plácido Amaral hatete prontu lori PR manan iha suku Vesoru hodi oportunidade ba vesoru-oan lori moris di'ak ba povu Vesoru.

Tuir kedas Koordenadór Postu Administrativu Watulari, Mateus de Oliveira deklara, prontu organiza povu Watulari vota ba PR tanba partidu ne’e sai úniku hahú programa moris di'ak ba povu tomak iha área edukasaun, uma moris di'ak, kréditu no bisnis ne'ebé la'o daudauk hodi hasai povu husi ki'ak no mukit.

Iha tempu hanesan, Koordenadór Republikanu Munisípiu Vikeke, Paulo da Costa hateten, estrutura Republikanu Iha munisípiu ne’e preparadu hodi lori partidu ne’e hasoru eleisaun antesipada no manan iha Vikeke.

Rate this item
(0 votes)

Independente Digital TV