PD rasik simu ona konvite husi FRETILIN atu kolia kona-ba formasaun VII Governu Konstitusionál, maibé lideransa superiór PD seidauk bele halo desizaun, tanba presiza deside liu husi konferénsia nasionál.
“Ami sei halo konferénsia nasionál iha tempu badak nia laran hodi deside polítika PD nian ba oin ne’e oinsá”, dehan Prezidente Konsellu Polítiku Nasionál (KPN) PD, Adriano Nascimento, iha Uma Fukun Parlamentu Nasionál, foin lalais ne’e.
Nia esplika, partidu FRETILIN halo ona karta ba PD atu tuur hamutuk hodi kolia formasaun VII Governu. Tanba ne’e, lider PD ho partidu sira seluk ne'ebé hetan asentu iha PN sei tuur hamutuk.
“Depois de halo negosiasaun no komunikasaun formál no naun formál ho partidu mais votadu no partidu sira ne'ebé hetan asentu iha Parlamentu Nasionál, ami halibur fali lider partidu sira husi munisípiu hodi halo desizaun”, dehan Adriano.
Nia hatutan, PD hakarak atu serve povu liu husi kadeira hitu ne'ebé povu oferese. Tanba ne’e, foin lalais FRETILIN direije ona karta ida ba partidu maibé konteúdu husi karta ne’e labele fó sai.
Maski agora daudaun formasaun VII Governu sei halo hela, maibé PD prontu atu serve nasaun.
“Tanba ami nia moto dehan tiha ona katak “Ba Ó Timor Ami Prontu Atu Serve” tanba ne’e, ba PD kualkér pozisaun ami prontu”, tenik nia.
Aleinde ne’e, Presidente CPN Partidu Demokrátiku mós agradese ba partidu CNRT, tanba bele deside ona nia pozisaun hodi sai hanesan opozisaun iha parlamentu nasionál. Tanba desizaun ne’e hatudu katak bele halo balansu polítika iha Uma Fukun.
“Ha'u fiar katak Partidu CNRT bele ezerse nia kompeténsia polítika ne'ebé iha, tanba iha tinan 10 nia laran kaer governu no ohin loron sai fali opozisaun. Ne’e hatudu polítika ne'ebé iha ona balansu”, dehan Adriano.
Entretantu, iha fatin hanesan, deputadu bankada PD, Virgílio Hornai hatete, atu harii governasaun la'ós buat fasil. Tenke buka desizaun polítika ne'ebé di'ak no metin relevante ho situasaun.
“Liu husi aprosimasaun sira ne’e oinsá mak atu bele rona parte hotu-hotu atu nune’e VII governu ne'ebé mai ita hakarak asegura estabilidade governativa ida”, dehan nia.
Nia hatutan, estabilidade governativa ne’e pontu importante ne'ebé sai hanesan kultura polítika atu ba futuru sai hanesan aliserse ida metin ona atu labele sai hanesan preferénsia bainhira estabilidade governativa ne’e laiha.