“Husu ba osan mean na'in tolu ne’e tenke fó liman ba malu. Bainhira sira la hamutuk ita nia nasaun la ba oin”, dehan nia, iha Kuartél Jerál PNTL, horisehik.

Jenerál Fitun Rua ne’e hatutan, sira na'in tolu tenke tuur hamutuk. Karik iha desentendimentu ruma iha funu laran, pasadu nian, tuur hamutuk hodi rekonsilia. Nune’e, konvense malu kona-ba sala sira ne’ebé halo iha pasadu.

Lere haktuir lia-hirak ne’e, tanba situasaun polítika hahú namanas iha nivel polítika nian.

Eis-gerrilleiru ne’e reforsa tan, bainhira nasaun mak nune’e hela de'it ema oportunista sira hamnasa ba nasaun ho povu ne’e.

Nune’e eis-gerrilleiru ne’e haktuir, husi 1976 ho 2006 timoroan barak mak oho malu laiha solusaun. Nune’e iha 2006 ema barak oho malu, forsa armada ho Polisia barak mak mate.

Sala sira durante halo ne’e nu’udar lisaun boot ida. Tanba ne’e, husu ba lider na’in tolu ne’e atu se liman ba malu, atu labele akontese fali krize perturbasaun iha nasaun ne’e.

Eis Gerrilleiru ne’e deklara katak aprende husi sala mak hetan vitória. Nune’e, lider na’in tolu tenke se liman ba malu, labele halo povu terus ba beibeik. Tanba nasaun ne’e hakarak estabilidade no pás nia laran.

Tanba ne’e, Xefe Estadu Maiór F-FDTL ne’e deklara katak bainhira ida-idak arrogante lakohi rekoñese sala, nasaun ne’e la ba oin. Tanba ne’e, Mari Alkatiri, Xanana ho Ramos Horta tenke hamutuk malu hodi hasai povu husi mukit no kiak.