Domingu, 23 Setembru 2018 | Login
Bandeira Partido KHUNTO Bandeira Partido KHUNTO

KHUNTO La Tolera Membru Governu Envolve KKN Featured

DILI: Bankada Partidu Kmanek Haburas Unidade Timor Oan (KHUNTO) iha Uma Fukun PN deklara sei la tolera kandidatu membru governu ne’ebé pozitivamente envolve aan iha krime Korrupsaun Koluzaun no Nepotizmu (KKN) atu labele hola parte iha estrutura VIII Governu Konstitusionál.

“Karik husi tribunál akuza ona kandidatu membru governu ne’ebé Prezidente Repúblika kansela ne’e loos duni katak komete duni krime KKN ami husi Partidu KHUNTO mós apoiu desizaun ne’e”, Tuir Vise Presidente Parlamentu Nasionál, Luis Roberto, iha PN horisehik.

Nia dehan, daudaun ne’e politikamente Primeiru Ministru mantein nafatin lista kandidatura membru governu ne’ebé mak aprezenta ona ne’e, tanba tribunál rasik seidauk foti desizaun ruma hodi akuza membru hirak ne’e loos ka sala.

Haree ba lei kuandu kandidatu membru governu hirak ne’e mak hetan duni ona akuzasaun dehan komete ona korrupsaun kuadru no superiór partidu sira mós tenke komprende substitui hodi tau fali ema seluk.

Iha fatin hanesan, deputadu FRETILIN, Joaquim dos Santos hatete, formasaun governu bazeia ba Konstituisaun Artigu 160 númeru 1, Prezidente Repúblika nomeia no fó pose ba PM depois xefe governu aprezenta kandidatu membru governu ba PR atu fó pose tanba ne’e sira iha hotu podér konstitusionál.

Tanba ne’e, kuandu kandidatu membru governu ne’ebé PM indijita antes PR atu nomeia nia sei uza nia kompeténsia konstitusionál hodi halo fiskaliza saun preventiva prosesual ba ema hirak ne’e.

Figura públiku hirak ne’e ema teknokrata atu ba jere administrasaun públiku, tanba ne’e presiza duni tau ema ne’ebé iha integridade hodi ba jere. Tanba ne’e, konstituisaun fó podér ba nia atu halo fiskalizasaun, se nia la halo ida ne’e problema mosu todan ne’e sei tula iha nia leten.

Tuir nia, iha partidu CNRT, PLP no KHUNTO ema matenek barak tebes nusa mak labele troka ema hirak ne’e, nune’e tenke depende de’it ba sira hodi sakrifika povu maioria nia futuru ne’e PM tenke tau konsiderasaun. 

Read 1214 times
Rate this item
(0 votes)