“Ha’u Laiha Problema Pesoál ho Xanana” Featured

By Cristina Ximenes Abril 06, 2018 1152
Alkatiri Alkatiri

DILI: Mari Alkatiri no Xanana Gusmão to’o oras ne’e seidauk ‘hasé malu’. Hotu-hotu iha objetivu hanesan atu luta ba direitu povu no nasaun nian kona-ba fronteira marítima, maibé laiha kooperasaun servisu ba malu.

Hafoin fila husi prosesu negosiasaun, Gabinete Negosiasaun Fronteira Marítima, ne’ebé iha inisiu forma iha Gabinete Primeiru Ministru nia-okos, to’o oras ne’e seidauk aprezenta relatóriu rum aba Governu.

Ne’e duni, Primeiru Ministru, Mari Alkatiri, sente dezapontadu uitoan ho hahalok Xefe Negosiadór Xanana Gusmão, tanba la halo aprezentasaun relatóriu ruma ba governu.

“La'ós atu aprezenta uluk ba públiku loloos ne’e liu husi Konsellu Ministru. Ha’u respeitu maun boot Xanana tanba laiha problema pesoál ho Xanana”, dehan Alkatiri, iha Palásiu Prezidensiál Bairru-Pité, horisehik.

Xefe Governu dehan, la'ós atu kontra Xanana Gusmão, maibé bainhira halo jestaun ba Estadu tenke hatene fatin atu servisu ba ne’e.

Bainhira Xanana Gusmão servisu ba Estadu tenke hatene uluk lai iha Timor-Leste ne’e soberania haat de’it maka hanesan Prezidente Repúblika (PR), Primeiru Ministru (PM), Parlamentu Nasionál (PN) no Tribunál Rekursu (TR), servisu ne’ebé halo ne’e loos ida ne’ebé.

Se bainhira halo negosiasaun internasionál ne’e, Timor-Leste nia konstituisaun hateten ne’e governu. Tanba ne’e, aprezenta uluk iha Konsellu Ministru, la'ós kampaña ba públiku.

Ne’e duni, Ministru Agio Pereira hanesan adjuntu Primeiru Ministru hodi aprezenta relatóriu hanesan dokumentu ba governu, maibé Xanana Gusmão maka Xefe Negosiadór ba Fronteira Marítima.

Tan ne’e, maka Xefe Governu hakarak simu relatóriu husi Xefe Negosiadór Fronteira Marítima, Xanana Gusmão, hodi bele halo diskusaun iha Konsellu Ministru, depois maka governu aprezenta ba Parlamentu Nasionál maka foin halo relatóriu hodi haruka ba Estadu Unidas Amérika (EUA).

Alende ne’e, governu atu halo negosiasaun ho Indonézia ne’e hein Eleisaun Antesipada (EA) hotu maka foin halo preparasaun, tanba agora ne’e sei fokus ba eleisaun.

Rate this item
(0 votes)

Independente Digital TV