Print this page

Governu Labele Ansi Foti Osan Selu Asaun Featured

By Jacinto Xavier Fevereiru 14, 2019 5331

DILI: Bankada FRETILIN husu ba Governu labele ansi transfere osan husi Fundu Petrolíferu hodi selu asaun, tanba Tribunál Rekursu (TR) sei halo fiskalizasaun abstrata ba konstitusionalidade no legalidade alterasaun Lei Atividade Fundu Petrolífera (LAP).

Antes ne’e, Ministru Reformasaun Lejizlativa no Asuntu Parlamentár (MRLAP) Fidelis Magalhães hateten, iha tempu badak Governu sei informa mai iha PN kona-ba intensaun husu ba Banku Sentrál atu prosesa ona transferénsia osan tokon $ 650 hodi sosa asaun ConocoPhillips no Shell nian.

Lei kuandu vigora hela ninia ezekusaun labele adia. Lei ne’e la vale bainhira lei foun altera, tanba ne’e prosesu ba husu fiskalizasaun abstrata ne’e prosesu husik la’o depois mak sira hetan resposta husi Tribunál.

“Lei ne’ebé vigora hela ne’e tuir duni rekizitu konstitusionál”, dehan nia, iha PN Sesta (10/2).

Hataan ba kestaun ne’e, Bankada FRETILIN liu husi konferénsia imprensa deklara, alterasaun LAP inklui provizaun ne’ebé kontra Konstituisaun no ameasa sustentabilidade ba úniku fundu soberania Fundu Petrolíferu.

Deputadu Joaquim dos Santos ‘Boraluli’ hateten, iha loron 30 Janeiru 2019 Deputadu na’in 23 husi Bankada FRETILIN no Bankada Partidu Demokrátiku (PD) hatama rekerimentu ba Tribunál Rekursu (TR) husu fiskalizasaun abstrata ba konstitusionalidade ba Dekretu Parlamentu Nasionál no. 3/V kona-ba Primeira Alterasaun ba Lei No. 13/2015, Lei Atividade Petrolífera.

Rekursu ne’e halo tanba defende transparénsia iha jestaun ba finansas públika, asegura utilizasaun responsavel ba rekursu finanseiru nasaun. FRETILIN mós defende dezenvolvimentu sustentavel, atu garante benefísiu ba ema hotu-hotu, la’ós de’it ba jerasaun ohin nian, maibé ba jerasaun sira iha futuru mós.

“Bainhira Tribunál Rekursu sei delibera kona-ba rekursu ne’e, mezmu lei vigora hela, maibé hotu-hotu tenke hein antes halo prosesu levantamentu ruma”, dehan nia, iha Uma Fulun PN, horisehik.

Bainhira hanoin ho sentidu Estadu fó tempu loron 30 ba Tribunál Rekursu atu halo desizaun hafoin bele ezekuta, la’ós koko atu foti osan lalais tanba de’it ta’uk desizaun ne’e bele la favorese ba Governu.

Tuir nia, kuandu governu obriga aan foti osan ba selu asaun mak to’o ikus Tribunál Rekursu deside LAP ne’e inkonstitusionalidade, signifika lei ne’e rasik nulu tenke fila-fali ba lei anteriór, entaun governu labele halo investimentu liu 20%.

Rate this item
(0 votes)