Sekretáriu Jerál partidu FRETILIN Mari Alkatiri dehan, Veteranu no antigu kombatente iha munisípiu barak mak seidauk rejistu no simu osan tanba failla iha komisaun omenajen.

“Balun oan veteranu ona, maibé aman ho inan seidauk hetan veteranu tanba aman ho inan FRETILIN oan asvezes bosok sira katak partidu seluk”, dehan nia iha kampaña ho tipu diálogu ho povu postu administrasaun Iliomar-Lautem, Dominggu (09/07).

 Kaer ukun, Alkatiri dehan, FRETILIN hakarak atu veteranu hotu-hotu simu osan liu husi hari’i komisaun omenajen foun atu rejista naran veteranu ne’ebé seidauk tau naran no tau naran ona ,maibé seidauk simu osan.

Polítika FRETILIN hakarak komisaun omenajen rejista naran no avaliasaun tenke prosesa kedan pagamentu atu labele hein too mate de’it mós la simu.

“Balun dehan FRETILIN mak ukun veteranu no antigu kombatente sira la simu osan ne’e bosok imi de’it”, dehan SekJen FRETILIN ne’e.

Programa FRETILIN, nia informa, rezolve osan ba veteranu no ferik katuas la’ós atu obriga ema sira atu tama iha partidu A ka B mak foin rezolve nia direitu.

 Iha fatin hanesan,Veteranu David Besi Asu husu ba FRETILIN bainhira kaer ukun atu haree komisaun omenajen tanba servisu la loos.

Nia konta, partidu balun mai dehan, labele hili FRETILIN tanba manan hodi kaer ukun veteranu la simu osan, Maibé nia dehan, FRETILIN iha FALINTIL iha, FRETILIN iha rezisténsia iha, FRETILIN iha veteranu iha, FRETILIN nia oan obra FRETILIN nian la’ós ema seluk nian.

Entretantu, Veteranu Suku Atelari Vicente do Carmo dehan, estadu liu husi Komisaun omenajen halo diskriminasaun direitu veteranu sira nian ne’ebé presiza hadi’a.