FRETILIN-PLP Hahú Ko’alia Proporsionalidade Featured

By INDEPENDENTE Agostu 29, 2017 2387
Alkatiri ho Taur Matan Ruak Alkatiri ho Taur Matan Ruak

DILI:Hafoin iha konkordánsia signifikante entre partidu koligasaun sira, Segunda (28/8), horisehik, ekipa diskusaun estrutura partidu FRETILIN no PLP kontinua halo soru-mutu hodi diskute kle'an liután kona-ba proporsionalidade programa knaar iha órgaun soberanu sira.

Adjuntu Sekretáriu Jerál FRETILIN, José Reis, esplika katak semana kotuk sira troka ona dokumentu ezbosu balun para bele halo diskusaun. Tanba ne’e, sira tuur hamutuk fali atu aserta pontu sira ne’e.

“Ami hetan duni pontu enkontru balun iha dokumentu ne’e. Ami sei hato’o fali ba lider partidu na’in rua, depois mak sira na’in rua sei foti desizaun ba pontu sira ne’e. Pontu importante sira ne’e mak ko'alia kona-ba prinsípiu koligasaun”, tenik nia.

Nune’e, Vise-Prezidente PLP, Fidelis Magalhães hateten, enkontru ne’e sira ko'alia kona-ba aliserse fundamentu, valór no misaun atu partilla hanoin ida hodi lori Timor ida ba futuru.

PLP nia hanoin katak, prosesu mak la'o nune’e duni no presiza hein to’o loron 5 Setembru 2017.

Tuir nia, antes ne’e PLP rasik espresa ona ninia hanoin ne'ebé relasiona ho konstitusionalidade, maibé ida ne’e mak prosesu. PLP kontinua iha nafatin ninia interese ba Estadu ne’e.

Enkontru ne’e hetan la hetan partisipasaun husi Prezidente PLP, Taur Matan Ruak. Sekretáriu Jerál FRETILIN, Mari Alkatiri, maibé fó de’it motivasaun ba ekipa diálogu sira hodi kontinua halo diskusaun ho di'ak hodi hetan dalan di'ak ba koligasaun.

Rate this item
(0 votes)

Independente Digital TV