Kinta, 17 Janeiru 2019 | Login
Komandante Jeral PNTL, Komisariu Julio da Costa Hornai Komandante Jeral PNTL, Komisariu Julio da Costa Hornai

Diferensia Regra PNTL ho F-FDTL, Direitu Halo Rekursu Kontra Desizaun Komando Featured

DILI: Kazu pesoal polisia tiru mate ema na’in tolu no hakanek ema na’in lima seluk iha Kuluhun, hamosu komentariu no kritika ba instituisaun Polisia Nasionál Timor Leste (PNTL). Mosu duvida iha públiku ba seriedade Komando PNTL prosesa sira-nia membru ne’ebé komete krime.

Aleinde duvida ne’e, públiku mós hahú halo komparasaun regra disiplinar iha instituisaun PNTL ho instituisaun FALINTIL-Forsa Defeza Timor Leste (F-FDTL) ne’ebé hanesan rigorozu tebes.

Ba kestaun ne’e, Komandante Jeral PNTL, Komisariu Julio da Costa Hornai, rekoñese katak regra disiplinar PNTL nian diferente ho F-FDTL.

Tuir nia, iha diferensa regulamentu instituisaun PNTL nian ho FALINTIL-Forsa Defeza Timor Leste (F-FDTL) bainhira atu foti desizaun ba sira-nia membru ida. Iha F-FDTL desizaun masimu iha Xefe Estadu Maior nia liman.

“Kuandu despaixu (Xefe Estadu Maior) tuun ona, atu halo fali rekursu (ba tribunal) mós laiha ona dalan,” dehan Komisariu Julio ba jornalista sira, Sesta (23/11).

Maibé ba PNTL nian, Julio dehan, lei ka regulamentu disiplinar instituisuan nian fó dalan ba individu ida ne’ebé simu ona pena, iha direitu masimu, atu halo rekursu hodi kontra desizaun Komandante Jeral no Ministru Defeza no Seguransa nian, ba tribunal.

Nia fó ezemplu kona-ba pesoal polisia na’in tolu ne’ebé Komando fó pena demisaun tinan lima, maibé hafoin hato’o rekursu ba tribunal, membru hirak ne’e manan no fila fali hala’o sira-nia servisu.

“Ami-nia membru na’in tolu bainhira komando foti tiha ona pena demisaun ba tinan lima. Depois sira halo fali rekursu ba tribunal, sira manan. Entaun sira fila fali mai kontinua servisu. Instituisuan tenke selu fali sira-nia osan hahú husi tempu ne’ebé sira para servisu,” dehan Komisariu Julio.

Ho razaun ida ne’e, nia hatutan, Komando PNTL la brani atu públika ba públiku prosesu demisaun ba nia membru sira.

“(Bainhira públika demisaun) Ita bele hamosu duvida iha públiku. Membru ida hetan tiha ona demisaun depois hatais farda mai servisu fali ne’e oinsa,” katak nia.

Prosesa Ona membru 902

Maske regra ‘ladun’ forte, maibé Komando PNTL la taka matan. Hahú kedan iha tinan 2000 to’o tinan ne’e, Komando Polisia Nasionál Timor Leste (PNTL) prosesa ona pesoal polisia ne’ebé kontra lei.

Kazu hirak ne’ebé Komando PNTL prosesa maioria mak kazu abandona servisu la ho koñesimentu, baku ema, inklui uza sala armas.

Husi membru 902 ne’ebé prosesa, kuaze na’in 199 mak hetan ona demisaun, na’in 58 prepara hela rekursu no na’in 41 mak hetan hela suspensaun husi loron 121 to’o loron 240.

Aleinde ne’e, nia hatutan, sei iha mós polisia na’in 351 mak hetan suspensaun hasees husi servisu durante loron 20 to’o loron 120. Pena multa na’in 93, refrisaun eskrita na’in 225 no refrisaun verbal na’in 25.

Read 439 times
Rate this item
(0 votes)