Durante diskusaun deputadu sira baku meza ba malu hodi husu responsabilidade ba Bankada KHUNTO atu responsabiliza kona-ba karreta Prado ne’ebé sira halo aat.
Deputadu Bankada FRETILIN, Gabriela Alves, ho emosaun no baku meza hodi hateten, karreta Prado dezde III Lejizlatura problema ona. Deputadu sira naran fo'er tanba karreta Prado.
“Halo aat tenke iha responsabilidade duni, tanba ne’e gastu osan povu nian boot. Ami sira agora iha ne’e naran fo'er hotu. Sa'e karreta mós dignidade laiha”, tenik nia, liu husi Plenária iha Uma Fukun PN, horisehik.
Ne’e duni, tuir nia, informasaun ne’ebé hasai husi Parlamentu Nasionál la sala, tanba públiku presiza hatene kauza husi karreta ne’ebé aat no sé mak halo.
Entretantu, Deputadu Bankada KHUNTO, José Agostinho da Silva, sente ikus-ikus ne’e hetan ‘atake’ makaas husi públiku relasiona ho karreta Prado xapa matríkula PN 97, ne’ebé aat tanba sira enxe sala kombustivel.
Tuir nia, kauza ne’e tanba konferénsia imprensa ne’ebé portavós Parlamentu Nasionál nian halo hodi deklara loloos saida mak akontese hodi halo karreta ne’e hetan avaria.
“Ne’e sentidu husi konferénsia imprensa. Ne’e hatudu katak ema ne’ebé uza transporte ida ne’e nia la kompriende atu atenta kombustivel”, dehan nia.
Nia esplika, karreta Prado ne’e Bankada KHUNTO enxe kombustivel sala tanba bazeia ba dokumentu ne’ebé tékniku administrasaun sira katak karreta ne’e enxe ho gazoel. Maibé loloos maka enxe ho gazolina.
“Bazeia ba dokumentu ne’ebé entrega husi Administrasaun Parlamentu Nasionál, iha laran hakerek katak gazoel, tanba ne’e mak iha tempu ne’ebé enxe mina bazeia ba ba dokumentu ne’e”, dehan Agostinho.
Tuir nia, kazu ne’e rezolve ona iha reuniaun lider bankada, tanba ne’e Bankada KHUNTO sente portavós Parlamentu Nasionál nian halo propaganda hodi afeta ba dignidade deputadu no bankada KHUNTO.
Hataan ba preokupasaun ne’e, Prezidente Parlamentu Nasionál, Aniceto Guterres Lopes hateten, Portavós Parlamentu Nasionál hasai deklarasaun ne’e hodi hataan ba pergunta jornalista sira nian kona-ba atribuisaun no retribuisaun karreta Prado. Nune’e, ne’e deputadu balun hetan de’it apoiu husi operasionál parlamentu nian ba Bankada KHUNTO no PLP, maibé KHUNTO nian ida avaria, tanba motorista uza mina sala.
Nia dehan, portavós informa ne’e faktu, la’ós iha intensaun atu difama deputadu ida, tanba iha enkontru mós Prezidente Bankada KHUNTO no CNRT hateten ona.
Nune’e, portavós Parlamentu Nasionál, Lídia Norberta dos Santos, hateten, nia hala'o servisu bazeia ba despaxu husi Prezidente Parlamentu Nasionál, tanba IV Lejizlatura hakarak hakbesik-aan ba públiku liu husi atualizasaun informasaun husi Uma Fukun atraves média.
Nia dehan, informasaun ne’ebé fó ba públiku bazeia ba faktu ne’ebé akontese katak, deputadu Bankada KHUNTO halo-aat karreta Prado PN nian, tanba enxe sala kombustivel.
Tuir observasaun diáriu ne’e, maioria deputadu sira levanta kazu enxe sala kombustivel to’o oras termina no laiha ajenda foun ne’ebé debate iha tempu ne’e.
