Debate Partidu Polítiku La Efisiente Featured

By Jacinto Xavier Jullu 18, 2017 1495
Lider Partido Politiku sira halo debate Lider Partido Politiku sira halo debate

DILI: Debate públiku husi partidu polítiku sira ladún efisiente, tanba kuaze kompromisu polítiku ne’ebé lider partidu sira hato’o barak la relevante ho situasaun. Barak mak ko’alia liubá ideolojia.

Observadór polítika no dosente Universidade Nasionál Timor Lorosa’e (UNTL), Camilo Ximenes hatete, lider partidu polítiku sira debate barak liu ko’alia ideolojia partidu, maibé la ko’alia programa ne’ebé atu implementa bainhira kaer ukun.

“Ita ko’alia kona-ba ideolojia ne’e ita ko'alia programa ne'ebé sei iha nakukun laran de'it, maibé oinsá atu lori programa ida ne'ebé atu lori dezenvolvimentu ba naroman ne’e difisil atu ko’alia”, dehan nia, hafoin partisipa debate partidu polítiku, iha salaun CNE, horisehik.

Tuir nia, debate públiku partidu polítiku ne’e tenke organizadu didi'ak atu diskute kada programa partidu nian bainhira ukun sira atu halo saida hodi muda sosiedade nia moris.

Kuandu mai mak la ko’alia programa ne'ebé esensiál, maibé ba ko’alia fali programa sira ne'ebé la relevante ona ho situasaun, oinsá atu bele manan simpatia públiku nian.

“Ha'u hanoin mekanizmu debate sira ne’e mak ita tenke muda, pergunta sira ne'ebé atu fó ba kada partidu polítiku sira ne’e semana rua antes tenke to’o ona sira, atu nune'e sira bele preparadu hodi mai halo debate”, dehan Camilo.

Tuir nia, observasaun iha debate ne’e partidu barak mak nia programa ne'ebé hanesan. Tanba ne’e, sujere ba partidu hirak ne’e atu hamutuk hodi dezenvolve nasaun tanba sira iha planu no programa ne'ebé iha sustentabilidade ba futuru.

Nune’e, husu ba partidu polítiku sira atu tau programa debate ne’e barak liu kona-ba investimentu iha área rekursu umanu no infraestrutura. Halo reforma ba setór edukasaun atu lori edukasaun ne'ebé kualidade ba timoroan tomak.  

Rate this item
(0 votes)

Independente Digital TV