Print this page

CNRT-PLP-KHUNTO Nakfila ba ‘Aliansa Mudansa ba Progresu’ Featured

By Jacinto Xavier Fevereiru 03, 2018 1333
Opozisaun Opozisaun

DILI: Partidu tolu, CNRT-PLP no KHUNTO re-afirma sira nia pozisaun hodi halo koligasaun antes eleisaun. Atu avansa ba oin, partidu tolu ne’e deside ho naran Aliansa Mudansa ba Progresu (AMP).

Liu husi reuniaun alargada altu nivel ne’ebé partisipa husi estrutura nasionál, munisípiu no postu administrativu husi partidu tolu ne’e nian define ona naran ida hodi hakarak ba eleisaun antesipada.

Portavós AMP, Taur Matan Ruak hatete, iha eleisaun antesipada partidu tolu CNRT, PLP no KHUNTO sei avansa ho lista úniku no hetan apoiu husi Forum Demokrátiku Nasionál (FDN).

Aleinde naran, reuniaun ne’e mós aprova emblema bloku nian hodi lori ba rejista iha Tribunál Rekursu, nune’e bele hakat hamutuk ba eleisaun antesipada.

“Naran ba kandidatura ami seidauk bele fó sai tanba ami sei deside iha konferénsia nasionál ne'ebé sei halo iha tempu badak nia laran”, dehan Matan Ruak, iha Hotel Novo Turismo, horisehik.

Nune’e, nia mós fiar-aan katak eleisaun antesipada ne’e vitória iha ona AMP nia liman maski seidauk ba kampaña. Tanba, realidade AMP manan iha Parlamentu Nasionál ho kadeira 35. Ne’e duni, ba oin ne’e atu bele formaliza hodi bele hetan kadeira liu ida ne’e.

Nia hatutan, AMP seidauk bele deside naran sé mak atu tuur iha primeiru lista, tanba sei deside iha konferénsia nasionál hafoin bele lori ba rejistu iha Tribunál Rekursu atu bele hetan legalidade.

Iha fatin hanesan, Sekretáriu Jerál Partidu CNRT, Francisco Kalbuadi Lay hatete, Prezidente CNRT, Xanana Gusmão, konkorda atu partidu tolu ne’e la’o hamutuk hodi avansa ba eleisaun hafoin Prezidente Repúblika deklara eleisaun antesipada.

“Nia (Xanana) husu mai ami atu deklara ona AMP atu la’o ho pakote úniku”, tenik nia.

Tanba ne’e, atu legaliza koligasaun ne’e tempu badak sei realiza konferénsia nasionál ne'ebé partisipa husi Xanana Gusmão.

Iha fatin hanesan, portavós Forum Demokrátiku Nasionál (FDN), Hermenegildo ‘Kupa’ Lopes hatete, razaun husi FDN apoiu AMP hakat ba eleisaun antesipada tanba partidu tolu tolu ne’e iha prinsípiu hanesan ho sira.

Nia hatete, partidu sia ne'ebé hamahan aan iha FDN oras ne’e daudaun konfirmandu ona hodi fó apoiu totál ba AMP iha eleisaun.

 

Rate this item
(0 votes)