Maski nune’e, dirijente partidu CNRT rasik laiha koñesimentu ruma kona-ba konteúdu husi karta ne’ebé Xanana haruka ba Xefe Estadu, Francisco Guterres ‘Lú-Olo’.
Prezidente Konsellu Polítika Nasionál (CDN), Dionísio Babo Soares, rekoñese katak Xanana dirije karta ba Presidente Repúblika (PR), maibé konteúdu karta ne’e mak seidauk hatene loloos.
Nia hatutan, karta ne’e foin lalais haruka husi nasaun Singapura mai Timor ne'ebé simu direita husi Adjuntu Sekretáriu Jerál CNRT, Jacinto Rigoberto no iha momentu ne’e entrega kedas ba Sekretaria Prezidente Repúblika.
“Ha'u mós la hatene konteúdu karta ne’e” dehan Dionísio, iha Uma Fukun PN, Sesta (17/11).
Iha fatin hanesan, Prezidente bankada CNRT, Arão Noe de Jesus hatete, karta Xanana Gusmão nian ne’e, sira lider antigu mak dijere ba malu. Tanba ne’e, labele komenta konteúdu karta ne’e.
“Ha’u mós la haree karta nia konteúdu. Tanba ne’e, ha'u lakohi komenta”, dehan nia.
Nune’e, jornalista diáriu ne’e hakat ba sede partidu CNRT hodi konfirma direita ba Adjuntu Sekretáriu Jerál, Jacinto Rigoberto, maibé lakohi fó komentáriu, tanba iha asuntu importante ne'ebé atu trata.
Tuir informasaun ne’ebé diáriu ne’e hetan, konteúdu husi karta Xanana nian ba Lú-Olo, sei kontinua kaer nafatin ba pozisaun bloku Aliansa Maioria Parlamentár (AMP) nian, hodi la konkorda atu iha eleisaun antesipada.
Ne’e duni, husu ba Xefe Estadu halo prosesu foun ida hodi entrega podér ba bloku AMP hodi forma VIII Governu la ho eleisaun antesipada.
