Antes ne’e, kuadru CNRT fó data limitasaun loron 10 ba Xefe Estadu atu fó pose kandidatura membru governu na'in sia (9) ne’ebé nia naran sei pendente, karik laiha sei halo mosaun sensura.

Tuir Prezidente Bankada CNRT, Duarte Nunes hatete, Francisco Guterres ‘Lú Olo’ eleitu sai hanesan Xefe Estadu hetan kontribuisaun husi militante CNRT, maibé kuandu impase polítika ne’e mosu, partidu CNRT maka prejudikadu fali tanba kuadru sira la asume kargu ministru.

Militante CNRT haree ba desizaun Xefe Estadu la justu ba partidu ne’ebé uluk apoiu nia, entaun iha direitu atu dada konfiansa votu ne’ebé uluk fó eleisaun prezidensiál.

“Se sira haree to’o ona loron 10 maibé laiha rezultadu, kuadru sira ne’e mai tuur hamutuk ho kuadru nasionál sira presiza konvoka konferénsia ruma atu bele hola desizaun hodi dada hikas votu konfiansa militante CNRT nian ba Prezidente Repúblika”, dehan Duarte.

Nia hatutan, iha fulan Setembru hanesan ne’e mak Xefe Estadu nafatin la fó pose ba kandidatura membru governu hirak ne’e, sei fó impaktu ba governasaun.

Kuandu programa no Orsamentu Jerál Estadu (OJE) aprovadu ona hodi aloka ba iha ministériu sira ne’e, sé mak sei jere. Entaun servisu iha ne'ebá ne’e sei bele vakum.

Tuir Duarte, kuandu governu tau ona osan ba ministériu sira hakarak ka lakohi Primeiru Ministru tenke esforsu aan atu bele halo buat ruma oinsá bele responde ba situasaun.

Primeiru Ministru la'ós hili direita membru governu sira, maibé husi partidu mak hili hodi nia bele indijita. Tanba ne’e, partidu rekomenda ona naran sira ne’e mai husi estrutura partidu nian.

Maibé, kuandu Xefe Estadu la nomeia no fó pose sei difikulta ba partidu. Tanba ne’e, karik Xefe Estadu iha ona prova ruma katak sira ne’e komete duni ba aktu korrupsaun bele hatudu faktu ruma, atu bele kaer hodi ko'alia ho sira.