Sábadu, 16 Dezembru 2017 | Login
Opozisaun Opozisaun

AMP sei Halo Koligasaun Ba Eleisaun Antesipada Featured

DILI: Bloku Opozisaun Aliansa Maioria Parlamentár (AMP) kompostu husi partidu CNRT, PLP no KHUNTO iha planu atu halo koligasaun pakote ida antes hakat ba eleisaun antesipada.

Polítika ne’e nu’udar preparasaun antesipasaun ne’ebé bloku AMP halo bainhira Prezidente Repúblika, Francisco Guterres ‘Lú-Olo’, foti desizaun hodi halo eleisaun antesipada ba formasaun governu foun.

“Eleisaun antesipada se karik mosu bloku AMP sei pakote. Tun ba baze mós sei pakote. Ami garantia sei sai polítika ida de’it”, dehan Prezidente Bankada KHUNTO, Luis Roberto, iha Uma Fukun PN, foin lalais ne’e.

Nia hatutan, daudaun ne’e jurista balun fó hanoin katak atu solusiona problema krize polítika iha Timor dalan úniku mak ba eleisaun antesipada. Tanba ne’e, bankada opozisaun hakarak entrega prosesu tomak ba Xefe Estadu atu tetu didi'ak hodi halo desizaun ne'ebé di'ak tuir Konstituisaun haruka.

Nune’e, sosiedade barak hakarak atu tama lalais ba eleisaun antesipada, tanba ne’e opozisaun husu atu kria kondisaun no haree ba impaktu husi eleisaun antesipada ne’e.

Iha fatin hanesan, Prezidente Bankada CNRT Arão Noe de Jesus hatete, partidu tolu ne'ebé hamahan aan iha AMP iha ona konsentrasaun polítika hahú husi 2017 to’o 2022 hodi hasoru situasaun saida de'it.

Tanba ne’e, karik atu tama ba iha eleisaun antesipada partidu tolu ne’e atu hamutuk konforme fila-fali ba lider sira atu deside.

“Hau hanoin akordu ne’e hatete katak AMP ne’e hamutuk komesa hahú iha 2017 to’o 2022. Tanba ne’e, dalan ba ida ne’e iha”, dehan Arão.

Nia hatutan, AMP iha ona konkordánsia. Ne’e duni, iha dalan atu hamutuk hodi sai hanesan pakote ida hodi hasoru eleisaun antesipada.

Read 496 times Last modified on Sexta, 01 Dezembru 2017 09:26
Rate this item
(1 Vote)
  • MidAd1
  • Heineken Klaran
AdBottom1