Alkatiri ho Taur Ko’alia Segredu iha Minutu 40 Featured

By INDEPENDENTE Agostu 18, 2017 2069
Taur ho Alkatiri Taur ho Alkatiri

DILI: Antes delegadu partidu FRETILIN no Partidu Libertasaun Populár (PLP) diskute kona-ba plataforma governu nian, Sekretáriu Jerál FRETILIN, Mari Alkatiri no Prezidente PLP, Taur Matan Ruak, halo reuniaun segredu durante minutu haat nulu (40) nia laran.

Durante soru-mutu ne’e la’o laiha ema ida mak hetan asesu, inklui kuadru sira husi partidu rua ne’e.

Nune’e, hamosu espekulasaun oi-oin katak, deskonfia lider antigu na’in rua ne’e ‘kebit malu’ ona kona-ba estrutura governu sombra.

Tanba, depois diskusaun ne’e, kuadru husi partidu rua ne’e mós hetan autorizasaun hodi tama atu halo reuniaun hamutuk durante minutu tolu nulu ho ninia rezultadu ne’ebé hatudu hela sinál pozitivu ba koligasaun.

Husi formatu tolu ne’ebé durante aprezenta diskusaun hanesan governu grande inkluzaun, insidénsia parlamentár no koligasaun, rezultadu soru-mutu entre kuadru partidu FRETILIN no PLP konkorda atu diskute kle'an liu koligasaun.

“Ami konkorda malu katak di'ak liu husi ne’e ba oin diskute de’it koligasaun”, dehan Sekretáriu Jerál FRETILIN, Mari Alkatiri, hafoin enkontru, iha Hotel Novo Turismo, horisehik.

Ne’e duni, hafoin iha konkordánsia ba malu. Partidu rua ne’e sei ko'alia kle'an liu kona-ba formatu koligasaun nian.

“Aban-bainrua ami diskute tékniku ba koligasaun”, tenik Alkatiri.

Iha fatin hanesan, Prezidente PLP, Taur Matan Ruak mós reforsa katak, sira konkorda atu sira bele diskute kle'an liu kona-ba koligasaun.

“Ami sei diskute kona-ba koligasaun”, dehan Taur.

Maski nune’e, partidu rua ne’e seidauk ko’alia kona-ba pasta primeiru-ministru nian, tanba sei hein diskute hamutuk iha formatu koligasaun nian.

Prezidente PLP hateten, diskusaun kona-ba xefe governu nian seidauk ko’alia, maibé tempu badak FRETILIN no PLP sei anunsia pozisaun ne’e ba públiku.

Rate this item
(1 Vote)

Independente Digital TV