Sekretáriu Jerál Partidu FRETLIN, Mari Alkatiri dehan, bainhira partidu FRETILIN manan iha eleisaun sei sai vitória ba Xanana. Maibé iha parte seluk, Prezidente partidu CNRT, Kay Rala Xanana Gusmão dehan, bainhira partidu CNRT hetan votu maioria iha eleisaun, la'ós partidu mak manan maibé povu mak manan.

Liu husi komísiu kampaña eleitorál iha Suai, Sekretáriu Jerál Partidu FRETLIN, Mari Alkatiri hateten, membru governu sira halo tiha tinan sanulu Xanana konfia sira, maibé sira fila kung-fu fila nia, maibé FRETILIN sei la husik sira atu kung-fu tan Xanana.

“Tanba ne’e maka ha'u dehan, FRETILIN manan Xanana mós manan”, dehan nia, iha Suai, horisehik.

Tuir nia, FRETILIN de'it maka bele hatene dalan oinsá atu hasai povu ne’e husi kiak nia laran.

Alkatiri dehan, tinan sanulu ona maka sira kaer ukun, osan mina-rai barak barak husik ba sira, maibé rezultadu uitoan demais. Osan barak tebes sira gasta kualidade laiha. Osan barak maka sira gasta, la hatene dalan atu oinsá hasai povu husi kiak.

“Ita hotu ko'alia dehan hasai povu husi kiak, maibé FRETILIN deit maka hatene dalan ida ne’ebé atu hasai povu kiak”, tenik nia.

Tinan sanulu FRETILIN husik sira ukun husik nafatin sira ukun ho estabilidade no pás, maibé realidade saida rezultadu laiha. Buat sira ne’e tanba balun liman katar demais, matan mós kaan-teen demais, bolsu boot demais, matan haree envelope liman husi meza okos simu envelope.

Durante tinan sanulu, lurón ne’ebé sira halo taka kuak no loke kuak. Gasta osan barak ba durasaun fulan tolu to’o fulan neen tenke hadi'a fila fali. Emerjénsia ba - emerjénsia mai.

“Tanba ne’e tempu ona ita atu hahú prosesu naruk ida, prosesu naruk ida atu liberta povu ne’e, atu kore povu ne’e husi mukit, kore povu ne’e husi ki’ak”, dehan Alkatiri.

Nia hatutan, Planu Estratéjiku Dezenvolvimentu Nasionál (PEDN) aprova iha Parlamentu Nasionál iha 2011 atu lori fali prosesu dezenvolvimentu ne’e husi 2011 to’o 2030, maibé to’o agora planu iha gaveta, tanba envelope maka tama iha bolsu.

CNRT Manan Povu Manan

Entretantu, iha fatin ketak, Prezidente Partidu CNRT, Kay Rala Xanana Gusmão, liu husi nia diskursu iha komísiu kampaña eleitorál iha Suku Maumeta, Likisá hateten, bainhira partidu CNRT manan iha eleisaun, la'ós partidu mak manan atu kaer ukun, maibé povu mak manan.

Nia hatutan, partidu CNRT nia hanoin la'ós atu hadau ukun, maibé partidu CNRT iha ona kompromisu atu halo mak garante pás no estabilidade no dezenvolvimentu nasionál.

Ne’e duni, Xanana husu ba militante no simpatizante sira katak, CNRT fiar-aan sei manan iha eleisaun. Tanba ne’e, bainhira manan militante sira labele halo problema.

“Kuandu ita manan militante CNRT la'ós atu ba prova tun-sa'e, maibé tuur hakmatek atu halo servisu, tanba tempu agora tempu servisu, maibé la'ós tempu funu”, katak nia.

Nia hatete, bainhira partidu CNRT manan sei lori governu hakbesik ba povu tanba ne’e kompromisu partidu CNRT nian no sei kontinua saida mak iha ona.

Funu Hotu Mak Foin Koñese Xanana

Entretantu, Prezidente Partidu Libertasaun Populár (PLP), Taur Matan Ruak, iha ninia komísiu polítika katak, uluk iha sira na’in rua mak hatene malu liu. Sira ne'ebé agora tabele tuir ne’e buka ninia di'ak de'it. Funu hotu mak foin koñese malu, maibé uluk susar ne’e sira la haree malu.

Taur dehan, iha tempu nia sei ukun, tanba entre sira na’in tolu Xanana no Alkatiri, nia mak idade ki’ik liu, tanba lider na’in rua seluk labele ukun to’o tinan 20 oin mai.

“Entre sira ne’e ha'u mak tinan ki'ik ona. Tanba ne’e, sira sei labele atu ukun tan iha tinan 20 mai”, tenik nia.

Taur dehan, ministru sira ne'ebé tuir maun boot Xanana Gusmão tanba hakarak atu hetan kargu, maibé sira la hadomi Xanana.

Ne’e duni, tuir nia, sira hirak ne’e la’ós atu ajuda Xanana no sira nia oin nia koñese hotu. Sira hirak ne’e sei la brani atu ko’alia hasoru Taur.