Ajenda Rekursu Tarde AMP ‘Hirus’ Prezidente PN Featured

By Jacinto Xavier Dezembru 06, 2017 1243
Parlamentu Nasional Parlamentu Nasional

DILI: Bloku Aliansa Maioria Parlamentár (AMP) hatama ona rekursu ba demisaun orsamentu retifikativu no mosaun sensura ba governu, maibé laiha ajenda diskusaun ruma. Tanba ne’e, AMP ‘nia-hirus’ hodi hatama karta destituisaun ba Prezidente Parlamentu Nasionál.

Prezidente Bankada KHUNTO, Luis Roberto hatete, AMP halo karta destituisaun ba Prezidente PN tanba iha loron 21 Novembru, enkontru lider bankada AMP hatama karta rekursu ba demisaun OR no mosaun sensura ba meza PPN, maibé ignora de’it.

Nune’e, bankada tolu opozisaun ne’e hasoru tan Prezidente PN atu ko’alia kona-ba ajendamentu ba rekursu ne'ebé hatama ne’e, maibe kontinua ignora.

“Ami nia karta rekursu mós ignora, ami hasoru mós ignora. Tanba ne’e, ami AMP foti desizaun hodi halo karta destituisaun ba Prezidente Parlamentu Nasionál” dehan Luis, iha Uma Fukun PN, horisehik.

Ho situasaun ne’e, AMP hanoin katak Prezidente PN halo atendementu la imparsiál. Hali'is liu ba deputadu 30, la'ós sai prezidente ba deputadu 64 iha Uma Fukun ne’e.

Iha fatin hanesan, Prezidente Bankada PLP, Fidélis Magalhães hatete, karta destituisaun ne'ebé hatama ne’e iha razaun ne'ebé forte, tanba ne’e AMP hatama karta refere.

Meza PN simu ona, tanba ne’e hein de'it iha semana oin bele halo ona diskusaun iha plenária.

“Iha semana oin mak laiha deliberasaun ruma, ne’e katak ita halai sees husi responsabilidade”, dehan Fidélis.

Tanba ne’e, AMP fiar katak Prezidente PN sei iha bom sensu no interese institusionál ne’e obrigatóriu atu kumpre rejimentu no tenke konsidera mós bankada sira nian interese, tanba iha PN ne’e forsa polítika mai husi bankada sira ne'ebé eziste.

Hataan ba ida ne’e, Vise-Prezidente Bankada PD, Luis Mendes Ribeiro hatete, tuir loloos destituisaun Prezidente PN seidauk bele halo, tanba agora ne’e sei iha hela prosesu atu halo apresiasaun ba proposta orsamentu retifikativu.

Nune’e, Prezidente Bankada FRETILIN, Francisco Miranda Branco hatete, Prezidente PN durante ne’e lidera diskusaun ruma sempre tuir nafatin rejimentu PN nian no halo desizaun ruma tuir Konstituisaun haruka.  

Rate this item
(0 votes)

Independente Digital TV