Xefe Suku Mota-Ulun Apoiu Angela Hatun PR Lú Olo

By Ekipa INDEPENDENTE Agostu 11, 2020 4246
Rezistensia Nasionál Defende Justisa no Konstituisaun RDTL. Rezistensia Nasionál Defende Justisa no Konstituisaun RDTL.

LIKISA: Autoridade lokal husi Suku Mota-Ulun, Postu Administrativu Bazartete, Munisipiu Likisa deklara, prontu mobiliza komunidade sira hodi partisipa iha asaun ne’ebé Rezistensia Nasionál Defende Justisa no Konstituisaun RDTL organiza hodi hatun Prezidente Repúblika Francisco Guterres Lú Olo. Asaun ne’e rasik tuir planu sei hala’o iha 28 Agostu oin mai.

Xefe Suku Mota-Ulun, Francisco Soares deklara, nu’udar autoridade lokal, nia prontu mobiliza ninia komunidade hodi tuun ba Dili atu halo asaun pasifiku hodi ezije PR Lú Olo rezigna an.

Francisco hato’o deklarasaun ne’e hafoin partisipa iha programa sosializasaun ne’ebé halo husi ekipa RNDJ-KRDTL ne’ebé lidera husi Portavoz Angela Freitas, iha aldeia Mota-Ikun, Suku Mota-Ulun, Domingu (09/08).

Tuir Xefe Suku ne’e, nia ho nia komunidade sira hola parte iha sosializasaun husi ekipa RNDJ-KRDTL atu rona esplikasaun kona-ba violensia ne’ebé lider sira halo ba konstituisaun RDTL.

“Ami akompaña iha televizaun, na’i-ulun sira halo fali Konstituisaun iha okos, sira mak iha leten fali, entaun ha’u-nia komunidade, maun-alin sira, mai par hodi rona informasaun atu bele buka justisa no lia loos,” deklara Xefe Suku ne’e.

Tanba sente konvensidu ho esplikasaun husi portavoz RNDJ-KRDTL, Angela, nia hatete, nia prontu atu mobiliza komunidade sira hodi partisipa iha asaun ne’ebé sei hala’o iha Dili iha 28 Agostu.

“Ha’u prontu atu lori komunidade husi suku Mota-Ulun iha loron 28 ba hamutuk iha Tasi-Tolu, ha’u sei konvida sira, maibé seidauk hatene total komunidade hira mak ba,” dehan nia.

Francisco husu ba komunidade sira ne’ebé partisipa iha sosializasaun atu fila ba uma bele hatutan informasaun ba sira ne’ebé mak la partisipa, atu sira mós bele hatene violasaun ne’ebé lider sira halo daudauk.

Iha fatin hanesan, veterana Madalena Vidal Soares “Kasihan” ne’ebé partisipa mós iha sosializasaun husi RNDJ-KRDTL hatete, nia partisipa iha sosializasaun ne’e atu rona no buka tuir tanba sa mak meza Parlamentu Nasionál rahun.

“Ho laran triste no laran susar hakarak hato’o netik lia-fuan ruma hodi buka tuir dalan loos mak ida ne’ebé no la loos mak ne’ebé? Tanba sa mak ema mate barak hodi manan tiha nasaun, hodi kontente katak nasaun sai buras, derrepente de’it uma fukun kadeira, meza namkari, entaun sobu ona nasaun nia destinu, sobu nasaun nia abut,” dehan Kasihan.

Tuir nia, asaun husi deputadu sira iha PN ne’ebé rezulta meza PN rahun, hatudu katak sira nega tiha ona Timor-oan sira ne’ebé fakar ran hodi hatuur nasaun demokratiku.

Aleinde ne’e, Kasihan mós kestiona tanba sa mak to’o ohin loron Kay Rala Xanana Gusmão la hetan kadeira.

“Tanba saida mak maun Xanana to’o agora ema hotu la hatene nia hela fatin iha ne’ebé, ninia kadeira tau iha ne’ebé, hafoin hodi la’o lemo-lemo iha tasi leten, anin huu baku fila ba-mai, la’o hanesan labarik, see mak bolu netik nia hodi hamaus, hatudu ba povu katak maun boot Xanana nia fatin tuur mak ne’e, tanba saida mak laiha?.”

“Ami hakarak hatene ema ne’ebé halo nasaun nakdoko hodi hetan unkun an nia paradeiru iha ne’ebé? Ha’u harak husu de’it bainhira loos mak hatudu maun Xanana nia fatin? tanba nia uluk ami feto sira inimigu perkosa tiha mós ami la hatudu, mane sira mós ema lori listrik xoke buat lulik mós sei la deskobre Xanana nia subar fatin,” dehan Kasihan.

Rate this item
(0 votes)

Independente Digital TV