“Xanana Tur Rona De’it”, Iha Desizaun CNRT Hatoo Keixa ba TR Featured

By Aquino Gomes Maiu 20, 2020 3996
Presidente CNRT Kay Rala Xanana Gusmao Presidente CNRT Kay Rala Xanana Gusmao

DILI: Partidu Kongresu Nasionál Rekonstrusaun Timorense (CNRT), tersa-horsehik lorokraik enkamina ona keixa ba Tribunal Rekursu (TR) no Ministériu Públiku, tanba konsidera eleisaun Presidente Parlamentu Nasionál ne’e kontra Konstituisaun RDTL no  rejimentu Parlamentu Nasionál.

CNRT konsidera aktu partidu tolu, FRETILIN, PLP no KHUNTO illegal liuliu vise Prezidente Parlamentu Nasionál sira la hetan delegasaun kompeténsia maibé ba lidera meza, ne’e nu’udar asaltu de poder.

"Ami ohin (tersa-horsehik) enkontru urjente hodi afirma ami nia pozisaun, tanba prosesu sira ne'ebé la'o iha PN, ne'e prosesu ilegál, prosesu ne'ebé asaltu poder nian, kontra konstituisaun, kontra rejimentu, kontra lei LOFAP ninian, ne'ebé ami hatama ona keixa ba iha Tribunal Rekursu (TR) no Ministériu Públiku (MP) depois hein desizaun husi sira,"dehan Vise-Prezidente Bankada CNRT, Deputadu Patrocino dos Reis Fernandes, iha sede partidu CNRT Bairu Grillos, tersa (19/05).

CNRT hatama keixa liu husi advogadu Privadu, maibé la temi identidade advogdu privadu ne’e.

“Ami hatama ona keixa ne'e liuhusi advogadu ida, advogadu ida mak ba hatama, ne'ebé hein desizaun tribunal Rekursu  ninian,” dehan Patricino.

Deputadu CNRT ne'e akresenta, Prezidente Partidu CNRT Kay Rala Xanana Gusmão mai partisipa iha enkontru urjente ne’e maibé tuur rona de'it.

“Bainhira mak tribunal fó sai ne'e sira nia problema, maibé ami nia problema mak ba to'o tiha ne'ebá (tribunal) tenke prosesu, maibé ami hein Tribunal ninia pronunsia ne'e,”dehan nia.

Liga ba situasaun ne'ebé la'o iha PN, deputadu ne'e husu ba militante no simpatizantes CNRT nian hakmatek hodi akompaña prosesu sira ne'ebé lori ona ba iha Tribunál Rekursu.

Rate this item
(1 Vote)
Last modified on Kuarta, 20 Maiu 2020 13:09

Independente Digital TV