Print this page

Xanana Rona Liu Mafiozu Featured

By Ekipa INDEPENDENTE Setembru 20, 2019 3999
Xanana ho jestor kompania Xina Habour sira iha Kaitehu. Foto GMN Xanana ho jestor kompania Xina Habour sira iha Kaitehu. Foto GMN

DILI: Asaun eis Primeiru Ministru Kay Rala Xanana Gusmão hodi sobu lutu iha area Kaitehu, Munisipiu Likisa, hasai problema rai ne’ebé durante ne’e ‘falun metin’ hela ba públiku. Tuir Advogadu Kompaña Marino Enterprise, Pedro Aparicio, Xanana halo asaun ne’e tanba rona liu informasaun bosok husi kompaña Cina Harbour ne’ebé nia konsidera nu’udar mafiozu.

Advogadu ne’e dehan, durante ne’e Xanana nunka atu rona kompaña Marino Enterprise hanesan nain ba rai no rona informasaun barak liu husi kompaña Cina Harbour.

Pedro dehan, asaun ne’ebé Xanana halo tanba de’it iha dezintendimentu no aumenta tan ho kompaña Cina Harbour ne’ebé hanoin aat, hakarak sobu no soran Xanana ho rai nain.

“Durante ne’e maun Xanana nunka atu rona kompaña Marino Enterprise hanesan rai nain, nunka rona, maibé maun Xanana rona informasaun barak liu husi kompaña Cina Harbour ne’e. Tanba informasaun sira ne’ebé kompaña Cina Harbour fó ba Maun Xanana ne’e la loos, sala, bosok-teen, mafiaozu. Cina ida ne’e paling aat iha Timor mak nia ona.”

“Nia (Cina Harbour) utuliza (Marino Enterprise) nia rai no hakarak envolve tan governu, hakarak envolve hotu maun Xanana iha laran, ne’e mak nia hato’o informasaun bosok ba maun Xanana, no nia hatete sira rai nain (Marino Enterprise) ne’e aproveita situasaun hodi hola rai par halo espolarasaun ba Cina ne’e,” deklara Pedro iha Tribunal Distrital Dili (TDD), Tersa (17/09).

Maske Xanana sobu ona lutu iha Kaitehu, Pedro dehan, kompaña Marino Enterprise la fó sala ba Xanana tanba desizaun tribunal iha ona, maibé sala ne’e iha kompaña Cina Harbour.

Maske nune’e, nia husu ba Xanana atu labele rona ema husi li’ur ne’ebé nia foin koñese.

“Cina sira ne’e mai par buka serbisu iha Timor. Sira (Cina Harbour) ne’e mai hanesan kontratór, sira laos investor. Sira mai hetan osan depois sira ba ona,” dehan nia.

Tanba ne’e kompaña Marino Enterprise haruka ona karta ida ba Prezidente Repúblika Francisco Guterres Lu Olo, Prezidente Parlamentu Nasionál Arão Noe, Primeiru Ministru Taur Matan Ruak, no Prezidente Partidu CNRT Kay Rala Xanana Gusmão, hodi husu atu Xanana sai mediadór hodi rezolve ba problema rai iha Kaitehu, Munisipiu Likisa.

Advogadu Kompaña Marino Enterprise Pedro Aparicio informa, iha Segunda (16/09), nia parte hakerek karta ne’ebé diriji ba Xanana Gusmão, PR Lu Olo, Prezidente PN Arão, no PM Taur.

Nia dehan, Kompaña Marino Enterprise hakarak atu Xanana sai mediadór hodi rezolve problema ho kompaña Cina Harbour Lda.

“Ha’u lakohi fó mentariu kona-ba (asaun Xanana) ida ne’e, maibé atu solusiona problema ne’e horiseik iha loron 16 Setembru 2019 ha’u hakerek karta ida ba Sua Exelensia Maun Boot Kay Rala Xanana Gusmão par nia bele rezolve problema ida ne’e hanesan mediadór ka arbitru,” dehan Advogadu ne’e.

Rate this item
(0 votes)

Related items