Xanana Ne'ebé Sai Nafatin Besi-asu Featured

By Aquino Gomes Fevereiru 24, 2020 4357
Xanana Xanana

DILI: Lider karismatiku Kay Rala Xanana Gusmão kontinua sai "besi-asu" ne'ebé dada lider sira seluk hodi hakbesik aan. Maske lider partidu politiku balun iha esperensia moruk, maibé bainhira Xanana "loke liman" ho kontente sira hakbesik.

Partidu KHUNTO rasik ne'ebé liu husi ninia deputada Olinda Guterres deklara iha Parlamentu Nasionál (PN) kona-ba ninia arependimentu tanba halo koligasaun ho CNRT, bainhira deputadu CNRT sira la apoiu proposta OJE 2020, ikus mai deside mantein nafatin ho CNRT.

Partidu Demokratiku (PD) ne'ebé iha tinan 2015 sai "vitima" husi mudansa politika CNRT mós "la tauk" atu hamutuk fila fali ho CNRT.

Esperensia moruk partidu sira, liu-liu Partidu Libertasaun Popular (PLP), iha governu Aliansa Mudansa ba Progresu (AMP) la halo partidu sira seluk "tauk" atu la'o hamutuk ho CNRT.

Realidade hatudu duni ida ne'e. Iha Sabadu (22/02), lider PD, KHUNTO, PUDD, UDT/FM, hakat ba sede partidu CNRT iha Bairro dos Grilhos, hodi asina akta koligasaun foun.

Lider partidu politiku sira ne'ebé asina akta mak Prezidente CNRT Xanana Gusmão, Prezidente PD Mariano Assanami Sabino, Prezidente KHUNTO Armanda Berta dos Santos, Prezidente PUDD Antonío de Sá Benevides, Prezidente ezersisiu UDT Rudolfo Henrique Aparicio, no Prezidente Ezersisiu Frente Mudansa Egidio de Jesus.

Hafoin asina akta refere, Prezidente CNRT Xanana Gusmão deklara, bloku foun ne'e sei avansa ba formasaun governu dasia.

“Partidu neen (6) hamutuk hodi fó hanoin ba malu atu avansa ba nono governu. Kadeira 34, ami maioria parlamentu atu bele garante estabilidade ida,” dehan Xanana liu husi konferensia impresa.

Kona-ba esperensia moruk, PD ne'ebé sente ona deklara la lori esperensia pasadu hodi impede sira atu "salva nasaun".

“Ami la kaer esperensia ne’ebé mak iha, tanba esperensia ho CNRT no FRETILIN mós iha. Ami esperensia ho CNRT loos duni dehan katak iha V ba VI governu iha remodelasaun, iha tempu ne’ebá partidu CNRT halo remodelasaun hodi muda estratejia, tanba fronteira maritima tenke halo re-estrutura ba governasaun hodi bele inklui fila-fali elementus husi partidu Fretilin ninian".

“Primeiru ministru (Xanana) tenke husik nia kargu hodi entrega ba primeiru ministru ne’e husi Fretilin rasik, ne’e situasaun ida ne’ebé mak CNRT halo,” deha Sekretariu Jeral PD Antonio da Conceição "Kalohan".

Iha momentu ne'ebá, nia hatutan, PD mós sofre tanba implika ba membru governu husi PD.

Maibé, Kalohan hatutan, intensaun prinsipal mak tenke iha komprimisiu ida hamutuk ba fronteira maritima, nunee bele iha parlamentu nasionál votu ida de'it.

“Ida ne’e mak ami-nia esperensia hamutuk ho CNRT, dala-barak ema seluk dehan esperensia ida ne’e la di'ak, tanba CNRT hasees  PD, maibé Partidu Demokratiku la konsidera hanesan hasees ami,” dehan nia.

Xanana Tenke sai PM

Ho formasaun bloku foun ne'e, eis Prezidente Repúblika José Ramos Horta prefere atu Xanana Gusmão sai Primeiru Ministru hodi lidera governu foun ne'ebé sei mai.

“Ha'u mós hatete ba nia, maun boot (Xanana) ita mak tinan tolu (3) tenke kaer metin governu ne’e ho ita-nia autoridade, esperensia, ami hotu-hotu tane ita-boot serbisu ne’e la’o di'ak,” dehan Horta hafoin akompaña asina akta iha Sede CNRT, Sabado (22/02).

Nia dehan, Xanana ka’er pasta PM tanba iha esperensia  tinan rua nolu (20) ona iha governu, iha mós esperensia prezidensial no esperensia internasionál.

“Ha'u informal de'it, husi kotuk, buat ne’ebé maun boot Xanana, Mari Alkatiri no prezidente repúblika (Lu Olo) bolu, ha'u sempre prontu apoiu husi kotuk,” dehan nia.

Entretantu, kona-ba see mak atu sai PM no kompozisaun membru governu foun, Sekretariu Jeral PD, António da Conceiҫão ‘Kalohan’ hatete, iha tempu besik koligasaun ne’ebé lidera husi CNRT sei ko'alia kona-ba see mak atu sai PM no membru governu sira.

Munisipiu 10 Apoiu PD "Ukun" ho CNRT

Sekretariu Jeral Partidu Demokratiku (PD) António da Conceiҫão ‘Kalohan’ informa, PD liu husi ninia reuniaun extra-ordinariu deside hodi hamutuk ho CNRT forma governu foun.

Nia dehan, iha munispiu 10 mak deside hakarak atu ba hamutuk ho CNRT, munispiu rua 2 la deside no fó ba partidu mak foti desizaun, no iha munisipiu ida mak hola pozisaun atu fó fila ba prezidente repúblika hodi deside.

"Husi maioria ne’ebé mak deside tenke ba hamutuk CNRT, partidu nia pozisaun mak ida ne’e entrega fila-fali apoiu ba koligasun  ne’ebé lidera husi CNRT rasik, ida ne’e partidu demokratiku formaliza ho karta," nia hatete.

Rate this item
(0 votes)

Independente Digital TV