Xanana-Lú Olo Oin Hamnasa ba Malu, Alkatiri iha Kongresu KHUNTO Featured

By Cristina Ximenes Marsu 06, 2020 3570
Xanana ho nia aliadu sira hasoru malu ho Presidente Republika Fransisco Guteres Lu Olo. Foto Gabinete PR. Xanana ho nia aliadu sira hasoru malu ho Presidente Republika Fransisco Guteres Lu Olo. Foto Gabinete PR.

DILI:Marka istória foun no lisaun ida ba jerasaun foun sira husi maturidade politiku antigu sira ne’ebé hatudu ona realidade ida, katak iha vida politika laiha inimigu.

Maun Boot Xanana Gusmão nuudar Presidente partidu CNRT kumpri duni audensia hamutuk ho nia aliadu PD, KHUNTO, PUDD, UDT no F-Mudansa hodi hasoru Prezidente RDTL Fransisco Guterres Lú Olo.

Maski molok ne’e, Xanana Gusmão sempre rejeita lakohi hasoru malu ho Presidente Repúblika no halo kritika makaas hasoru Presidente Repúblika iha kanál media sira balun, maibé kontinua ho fuan boot, lider na’in rua ne’e hatudu oin hamnasa ba malu, kaer liman, iha sorumutu ne’ebé akontese, sesta-feira ne’e (6/3), iha Palacio Presidensiál, Aitarak Laran.

Entretantu iha loron hanesan, Sekretáriu Jerál partidu FRETILIN, Marí Alkatiri hanesan fundadór ida mós ba prosesa harii estadu, partisipa konvite husi partidu KHUNTO ba kongresu.

Lider partidu na’in rua ne’e (Alkatiri-Naimori) mós ho fuan boot simu malu, maski VII Governu Konstitusionál lideradu husi Alkatiri iha tinan 2018 monu, tanba partidu KHUNTO ses an husi koligasaun ba hamutuk fali ho opozisaun lideradu husi partidu CNRT.

Tuir observasaun Online INDEPENDENTE, iha terrenu katak, Sekretáriu Jerál FRETILIN Mari Alkatiri hakat ain ba kongresu KHUNTO ne’ebé simu direita husi Konselleiru KHUNTO, Naimori ho tara tais.

Sira na’in rua, hatudu oin hamnasa ba malu, kaer liman, ko’alia Halimar nuudar maun ho alin no nuudar amigo politiku.

Iha fatin ketak, partidu KHUNTO lideradu husi Presidente Armanda Berta hamutuk ho partidu koligasaun sira seluk hasoru Presidente Repúblika Fransisco Guterres Lú Olo hodi ko’alia kona-ba nasaun nia distinu.

Tanba ne’e, povu hein katak husi marka istória foun ne’e bele hamosu realidade ida husi rezultadu importante di'ak ba futuru Timor-Leste ida dignu.

Ita hein katak impase politika nebe durante ne’e lao, lábele kontinua nafatin ba oin, nunee hanoin ba prosesu desenvolvimento nasaun nian.

Rate this item
(0 votes)

Independente Digital TV