Segunda, 16 Dezembru 2019 | Login
Xanana ho Lu-Olo Xanana ho Lu-Olo

Xanana Lakohi Lu-Olo iha Segunda Ronda Featured

DILI: Ministru Planeamentu no Investimentu Estratéjiku (MPIE), Xanana Gusmão ofisialmente deklara apoiu ba Kandidatu Prezidente Repúblika Partidu FRETILIN, Francisco Guterres ‘Lu-Olo’.

Ho ninia apoia ne’e, Xanana lakohi atu iha segunda ronda iha eleisaun prezidensiál iha períodu ne’e.

“Povu tomak hatene katak ha'u temi tiha ona ha'u nia alin Lu-Olo ho pesoál ha'u apoiu, no nia sei manan iha primeira ronda de eleisaun prezidente” dehan eis prezidente Xanana Gusmão, iha ninia intervensaun bainhira inaugura Sede Nasionál Kampaña ‘Lu-Olo’, iha Ai-Mutin, Sesta (10/2).

Nia hatutan, 20 Maiu 2017, Timor-Leste selebra ninia independénsia ba dala XV. Maibé sei iha prosesu konstrusaun estadu no presiza la’o nafatin ba mundu hodi haree tanba rai barak mak sei oho malu no funu. Ne’e duni presiza ajuda malu tanba ne’e presiza figura hanesan Lu-Olo hodi armonia situasaun ne’e.

Nia haktuir, iha primeiru governu konstitusionál problema barak, estadu foin hahú no agora neineik-neineik, maibé to’o ohin loron seidauk to’o tan ne’e mak Lu-Olo iha esperiénsia asembleia konstituinte no transferénsia primeiru parlamentu kompriende di'ak kona-ba estadu.

Nia hatutan, Timor presiza ema ne'ebá iha leten aas ba, komprende estadu, iha sentidu estadu, hatene nia obrigasaun konstitusionál, hatene nia obrigasaun ba povu.

“Ha'u la'ós foin mak hanoin atu apoiu Lu-Olo ba prezidente Repúblika, maibé kleur ona ha'u apoiu Lu-Olo, tanba ne’e sé-sé de'it mak kandidatu aan ne’e ha'u la hatene no ha'u hatene de'it mak Lu-Olo,” tenik nia.

Iha fatin hanesan, Sekretáriu Jerál FRETILIN, Mari Alkatiri hateten, Lu-Olo kandidatu aan ba Prezidente Repúblika períodu 2017 – 2022. Dalan naruk tebes atu to’o iha loron ohin katak rai TL ida ne’e la’o ba oin bainhira ita bele hamutuk.

Hahú husi 2012 moto mak “hamutuk ita bele”, úniku figura ida ne'ebé lori ita mai hotu iha ne’e nia mak Lu-Olo. Figura ida halo sai realidade vontade ema hotu nian para hamutuk.

“Agora to’o ona tempu para foti ema ida ne'ebé bele iha sentidu estadu makaas tebes atu sai xefe estadu ba rai ida ne’e,” dehan Alkatiri.

Nia dehan, ema ne'ebé tinan 24 nia laran iha foho no tun mai hasai farda sai kedas prezidente asembleia konstituinte, balun duvida nia kapasidade atu prezudika asembleia konstituinte no nia hatudu ninia kapasidade sai prezidente konstituinte. Tinan tuir mai sai prezidente parlamentu bele dehan nia aprende mai husi kraik asistente polítika mai to’o Prezidente Parlamentu nia sente ne’e la to’o. Nia sei ba tuur hamutuk ho joven sira iha fakuldade direitu para hasai kursu direitu atu bele kompriende di'ak liu lejizlasaun, ne’e mak Lu-Olo.

Nicolau Lobato Ema hotu Nian

Entretantu iha fatin hanesan, Rogério Tiago Lobato reprezenta saudozu Nicolau Lobato afirma, husu ba kandidatu atu respeita no tau hamutuk kandidatu sira seluk ne'ebé hola parte mós iha festa demokrasia ida ne’e.

Nia mós subliña, Nicolau Lobato ema hotu nian, Timor nian, maibé patrimóniu FRETILIN nian.

Nia hatutan, Timor atu ba oin, atu manan hotu-hotu tenke hamutuk. Tenke respeitu ba kandidatura sira seluk ne’ebé partisipa iha festa demokrasia ne’e.

“Nicolau Lobato ita hotu nian, Timor nian, maibé patrimóniu FRETILIN nian. Kandidatu sira seluk bele uza nia naran hodi manan votu, maibé ne’e patrimóniu FRETILIN nian,” dehan Rogério.

Nia mós fiar katak Lu-Olo sei manan iha primeira ronda. Ne’e duni, husu ba ema hotu atu fó liman ba malu hodi foti Francisco Guterres Lu-Olo ba Prezidente Repúblika.

Programa Kampaña

Iha lansamentu ne’e, kandidatu Prezidente Repúblika Partidu FRETILIN, Francisco Guterres ‘Lu-Olo’ ofisialmente publika nia programa ba kampaña eleitorál.

Lu-Olo dehan, nia simu responsabilidade husi apoiante, militante no simpatizante sira ba kandidatura ne’e nu’udar kompromisu ba povu doben TL no rai lulik.

Lu-Olo apela iha anúnsiu formál ne’e, nia sei sai prezidente ba povu tomak, hakribi diskriminasaun, separasaun entre grupu, partidu, rasa, lian, relijiaun ka estatutu sosiál seluk. Sei halibur hamutuk ema hotu atu tau hanoin hamutuk hodi dezenvolve TL.

Promete defende riku-soin interese públiku legalidade konstitusionál, direitu no liberdade valór demokrátiku ne'ebé ema hotu-hotu hadomi iha mundu. Dezenvolve no hametin di'ak liu tan demokrasia atu bele hakat hamutuk ba oin.

Lu-Olo mós sei servisu makaas hodi haburas relasaun di'ak ho rai hotu-hotu no halo TL sai ponte ida ne'ebé liga Pasífiku no Ázia. Uza fronteira istórika no kulturál atu loke dalan tama iha Áfrika, Europeia no Amérika liu Comunidade dos Paises Língua Portuguesa (CPLP). 

Read 4826 times
Rate this item
(0 votes)

About Author

MidAd1