Vendedor Artezanatu Husu Governu Prepara Fatin Permanente Featured

By Joenaca da Conceicao Outubru 22, 2020 2205

DILI: Vendedor Artezanatu hato’o preokupasaun ba Ministériu Turizmu Komérsiu no Industria, tanba ministeriu ne'e presiza de’it sira nia produtu kreatividade hodi prienxe expozisaun maibé laiha planu atu fasilita sira hodi hetan fatin negósiu permanente.

Negosiante Artejenatu, Adelina Freitas hato'o nia preokupasaun bainhira simu konvite hodi partisipa iha enkontru preparasaun ba feira Lorokraik ne'ebé mak organiza husi MTKI ne'ebé sei hala'o iha ponte BJ Habibi Bidau.

“Durante tinan 15 ona mais ami nunka atu hetan fatin permanente hodi hala’o ami nia negosiu, ami laos atu laporan maibé dala ruma komisaun sira setuju ona ami halo negosiu maibe to’o fulan sanolu sira duni sai fali ami, ami ne’e halai ba mai hanesan bola ida karik soe ba mai de’it” dehan nia iha  CCD, Ohin (22/10).

Nia hatutan tanba la iha fatin ne'e mak ami halo buat ida la hun la dikin, buat ida sasan kultura nian ne’e iha valor ba ita dehan atu tau iha fatin ida seguru para ema mai husi rai liur bele hare’e katak ema Timor Leste mós bele maske foin mak ukun an mais nia sasan tradisonal ne’e tau duni iha fatin ne’ebé mak seguru.

"Mais la iha ami nian ami halo sasan tradisional buat ida karik la vale liu, maibé ita nia sasan kultura nian ne’e labele lakon husi ita nia tempu bisavo nian to’o agora ne’e mak ami sei kaer nafatin no halo ba oan sira." esplika nia

Negosiante ne'e husu atu governu bele prepara fatin ne'ebé permanente ba sira atu bele faan sira nia produtu kultural atu nune’e ema husi rai liur mai karik iha ona fatin ne'ebé permanente ho sasan kultura sira tenke kompletu iha laran.

"Ami laiha fatin seluk atu fa’an no hein feira de’it foin dadauk 2019 ne’e mak munisípiu autoriza iha largu nian iha Lesidere  seidauk komunika ba ami duni sai tiha ami no lori malu to’o iha Parlamentu dehan hein de’it maibe seidauk iha rezultadu turismu bolu fali ami atu ba tuir feiram iha ponte BJ Habibie nian." tenik nia.

Produtu ne’ebé grupu ne'e produsaun  maka  tais ba pasta, karteira, sapeu, saia Bluza produtu tais sira seluk ne'ebé la'o ona durante tinan 14 maibé seidauk iha fatin ne'ebé permanente.

Entretantu hatan ba preokupasaun ne’e Diretor Jerál Turizmu Jose Quintas hateten, koalia kona ba arte no kultura liga mós ba Sekertariu Estadu Arte no Kultura (SEAK).

" Sente ida ne’e hanesan preukupasaun ne’ebé ami sei koordena nafatin para oinsa futuru hau sente iha razaun tanba la hakmatek no muda tun muda sa’e" dehan nia.

Nia hatutan, sei identifika fatin iha Dili laran atu nune'e vendedor artezenatu sira bele hala’o sira nia atividade negósiu iha fatin ne'ebé permanente.

“Guvernu la taka matan pois sei hare’e tanba agora rai iha Dili laran ne’e maka sei preukupa, Guvernu tente para identifika fatin ruma para iha futuru inan-aman sira bele hakmatek iha fatin ida”  hakotu nia.

           

Rate this item
(0 votes)
Last modified on Kinta, 22 Outubru 2020 19:48

Independente Digital TV