Uza Karreta ‘G’ ba Finadu, Kondigu Penal sai KAK nia ‘Kilat’ Featured

By Cristina Ximenes Novembru 09, 2020 888
Kareta Estadu Kareta Estadu

DILI: Maske dekretu lei governu númeru 8/2013 kona-ba Regulamentu Atribuisaun no Uzus Veikulus Estadu fó ‘protesaun’ ba membru governu sira atu utuliza karreta estadu sees husi oras serbisu, maibé Komisau Anti Korrupsaun (KAK) sei uza Kodigu Penal hodi prosesa membru governu sira ne’ebé uza karreta estadu durante finadu.

Iha regulamentu refere, iha artigu 3 kona-ba Uzu Veikulu Estadu, iha paragrafu rua ne’ebé fó ‘forsa’ ba membru governu sira, mak, paragrafu 2 no 5. Iha paragrafu hatete; ‘Entende­se como período normal de utilização do veículo o período entre as 7 e as 19 horas, de Segunda a sexta­feira.’

Iha paragrafu 5 hatete; ‘A definição de “período normal de utilização do veículo”, prevista no parágrafo 2 deste artigo, não se aplica aos membros do Governo, aos Directores ¬gerais, aos Directores de Serviço e aos Administradores de Distrito’.

Maibé, tuir KAK paragrafu 1 husi lei refere define ho klaru oinsa veikulus estadu ne’e uza oinsa.

Iha paragrafu 1 hatete; ‘Os veículos do Estado serão usados para fins exclusivamente profissionais’.

“Iha lei ne'e, iha artigu 3 númeru 1 dehan katak ‘utilizasaun ba veikulu estadu ne'e so ba fins ka objetivu esklusivamente ba intrese professional’, laiha buat seluk,” dehan Adjuntu Komisariu KAK Luis Sampãio ba jornalista INDEPENDENTE via telefone, Sesta (06/11).

Luis hatete, iha artigu 3, paragrafu 2 hatete katak, periodu utilizasaun normál ba veikulu estadu ne'e hahú husi tuku 07:00 to'o tuku 19:00, husi Segunda to'o Sesta, no iha paragrafu 5 hatete utilizasaun normál ne'e la aplika ba membru governu, Diretór Jerál, Diretór Nasionál.

Maibé, nia hatutan, iha konteksu ida ne'e atu interpreta katak tanba definisaun 07:00 to'o 19:00 ida ne'e iha esepsaun, maibé nafatin iha ámbitu servisu profesionál nian, la'os servisu sira seluk.

“Dala-ruma ema interpreta katak sira livre husi movimentu ka utilizasaun iha oras normál ka oras servisu ninian ne'e sira la kona. Maibé iha lei ne'e artigu 3 númeru 1 ne'e dehan tiha ona katak ne'e só fins profesionál de'it, laiha tan buat seluk,” nia esplika.

Kona-ba prosesu ba membru governu sira ne’ebé uza karreta estadu durante finadu, nia hatete, KAK sei uza Kodigu Penal.

“Bainhira prosesa ne'e mak kodigu penál ko'alia kona-ba krime pekulatu de uzu ne'e, tanba ne'e kazu balun iha tinan sira kotuk KAK uza kodigu penál mak prosesa envolve membru governu ne'ebé utiliza veikulu estadu ne'e fora husi oras servisu, laiha autorizasaun, se iha autorizasaun, justifika, ida ne'e la tama ba kategória lori ba prosesu,” nia hatutan.

Molok ne’e, Iha 2 Novembru 2020, msou imajen ne’ebé públika husi utilizadór Facebook ho naran Dito Israel. Bainhira haree liu de’it laiha buat espesiál ida iha imajen ne’e, tanba mane ida ho membru familia balun hamriik hodi hasai foto hamutuk.

Maibé, buat ne’ebé sai kestaun maka karreta xapa matrikula 00.025G ne’ebé para iha Vise MNEK nia kotuk. Iha esplikasaun ba imajen ne’e hakerek “ Vizita avo sira Lisida”.

Hafoin imajen ne’e públika, utilizadór facebook barak maka screenshot no públika fila fali no balun hahú trata mgovernu ne’e.

Entretantu bainhira jornalista INDEPEDENTE konfirma kestaun ne’e Vise Ministru MNEK Julião hatan de’it katak to’o ohin loron nia seidauk simu notifikasaun husi KAK.

Rate this item
(0 votes)

Independente Digital TV