Ba kestaun ne’e parte husi  Ministeriu Ensinu Superior Siensia no Kultura (MESSK), liu husi Diretora Exekutivu Fundu Dezenvolvimentu Kapital Humanu (FDCH), hala’o ona enkontu ho Reitór UNPAZ, fó sai ona katak, bolseiru hamuutk na’in 410 ne’e sei distribui ba iha ensinu superior privada sira, husi númeru ne’e UNPAZ simu estudantes hamutuk 40.

“Husi 40 pesoas ne’e 20 pesoas sei aloka ba iha Fakuldade Teknolojia no Agrikula, no 20 pesoas seluk sei aloka ba iha Fakuldade Enjeñaria, ida ne’e sira mak desidi kedan, no mekanizmu ba selesaun ba bolseiru sira ne’e mós Fundu Kapital Humanu mak halo selesaun depois mak sira haruka mai,” dehan, Reitór UNPAZ Adolmando Amaral, liu husi Telefone, Kinta (04/03).

Antes ne’e, Diretora Exekutiva FDCH, Leila Carceres dos Santos hateten, orsamentu ne’ebé preve ba iha programa bolsu estudu bolsa hakbiit nian hamutuk millaun U$1.5 no husi estudantes ida kada fulan hetan U$120.

“Orsamentu ne’ebé mak prevé ita iha U$1.5 millaun ne’ebé atu atribui ba iha programa bolsu estudu, ba iha bolsa hakbiit. Iha diploma ministerial hatur iha ne’eba katak, kada bolseirus ida ho sira nia kustu de vida ita sei fó U$120, ne’ebé kobre ba sira nia alozamentu, transporte, alimentasaun, no sira nia didatiku, kada fulan entermus de atu selu sira nia propinas ne’e ita halo kooperasaun rasik ho universidade ne’ebé ita tranfere direita ba iha universidade,” dehan nia.

Kona-ba bolsa hakbiit rasik iha nia kontratu atu regula sira, bainhira sira ne’ebé mak la halo tuir kontratu sei dada fila, sira direitu no dever ne’ebé mak governu oferese ona ba sira.

Antes atu dada fila ida ne’e parte husi MESSK no FDCH sei haree lai problema saida mak sira iha.