Iha prosesu julgamentu primeiru interrogatóriu ne’e manifestante husi estudante timoroan na'in-14 ne’ebé la kumpre lei (dezobediénsia) hodi hala’o demonstrasaun hasoru Repúblika Indonézia.
Iha prosesu julgamentu ne’e tribunál seidauk bele halo desizaun tanba arguidu sira hili direitu nonook.
Tanba ne’e, iha prosesu Primeiru interrogatóriu Tribunál deside hodi liberta arguidu sira husi sela detensaun hodi hein prosesu julgamentu baibain iha loron 23 Juñu, iha tuku 4:00 loraik.
Tuir kronolojia, Polísia Nasionál Timor-Leste (PNTL) kaptura estudante timoroan na’in 14 iha Embaixada Indonézia, Palapasu, Segunda (15/6). Tanba sira halo protestu no uza panfeltu hasoru Indonézia hodi hatudu sira-nia solidariedade ba povu Papua.
Estudante sira ne’e la obediénsia tuir lei númeru 1/2006 kona-ba demonstrasaun, tanba atu halo demonstrasaun tenke dook husi edifísiu públiku, nune’e tenke iha karta koñesimentu ba polisia.
Ho atu ne’e, Ministériu Públiku promove arguidu sira ho krime dezobediénsia ne’ebé previstu iha artigu 193 Kódigu Penál.
Audiénsia julgamentu ne’e prezide husi juis singulár Ivan Suritay, Ministériu Públiku reprezenta husi prokuradór Cláudio Ximenes no arguidu sira hetan asisténsia legál husi Defensór Públiku, João Carvalho.
