Diretór Timor-Leste Coalition for Education (TLCE) José Monteiro hatete, Ministériu Edukasaun Juventude no Desportu (MEJD) halo ona investimentu  hodi halo matéria imprime ba ezame nasionál husi ensinu báziku to’o ensinu sekundáriu.

“Ita lamenta wainhira ita abandona ita nia sentru ne’ebé mak ita kria, ita rasik la tau konfiansa ba rekursu ne’ebé mak iha, entaun ita ba uza fali ema seluk nia sentru imprime, nu’udar instituisaun sosiedade sivil ita lamenta tebes tanba ida ne’e gasta ona rekursu estadu nian, se ita la fiar rekursu ne’ebé mak ita iha oinsa mak ema seluk bele fi’ar”, dehan Diretór TLCE iha nia knaar fatin, Kaikoli, Segunda (12/10).

Nia hatutan, TLCE deskonfia katak, sira iha interese grupu privadu atu nune’e halo imprime ho kompaña privadu sira hodi bele hetan osan balun, ho ida ne’e TLCE husu ba CAC iha situasaun hanesan ne’e bele halo investigasaun, nomós husu ba PDHJ atu nune’e bele hare’e tanba saida mak MEJD iha sentru imprime rasik maibé uza fali ema seluk nian, ho nune’e PDHJ bele halo monitorizasaun hodi buka risku sira ne’ebé mak utiliza poder ne’ebé mak la loos.