Tersa, 15 Outubru 2019 | Login
Ilustrasaun sosis. FOTO: ist Ilustrasaun sosis. FOTO: ist

TLCE Identifika Ayam Potong no Sosis iha Merenda Eskolar Featured

DILI: Rede ONG Timor Leste Coalition for Education (TLCE) liu husi ninia monitorizasaun identifika eskola balun oferese ayam potong no sosis ba estudante sira iha programa merenda eskolar.

Iha governasaun anterior, Ministériu Edukasaun (ME) no Ministériu Saúde (MS) lansa ona menu foun ba merenda eskolar, mak produtu lokal no naan fresku.

Koordenadór Nasionál TLCE, José Monteiro hatete, tuir estandarte menu merenda eskolar husi ME no MS programa merenda eskolar iha eskola sira tenke uza produtu lokal no na’an fresku.

"Ami idenfitika iha eskola balun iha kapital Dili, maibé dala-ruma de’it, kuzineiru sira halo modo ho sosis no ayam potong. Ida ne'e labele, la’os bandu maibé labele, tanba iha menu hatete ona,” dehan José ba jornalista sira iha nia knar-fatin Kaikoli, Tersa (26/03).

Nia esplika liu tan, menu ne’ebé loloos uza ba merenda eskolar mak produtu lokal hanesan koto, repoilu, naan karau no na’an manu fresku, no seluk tan.

Kona-ba implementasaun programa merenda eskolar, Koordenadór ne’e dehan, jeralmente programa ne’e la’o di’ak, maibé problema uitoan iha sistema distribuisaun foos.

"Programa ne'e durante la’o di’ak tebes maibé talves ho problema aproviozionamentu husi parte ministériu entaun difikulta prosesu distribuisaun foos no orsamentu ba eskola balun dala-ruma tarde," dehan nia.

Nia sujere ba ME atu hadia di’ak liu tan programa merenda eskolar, liu-liu iha parte bee no saneamentu iha eskola sira, tanba dala-barak eskola balun bee laiha nune’e obriga estudante sira tenke ba kuru bee bodi bele tein.

Entretantu, TLCE deklara la konkorda ho planu ME hodi asina Memorandum of understanding (MoU) ho organizasaun internasional CARE atu introdus paun (keju) hodi oferese ba programa merenda eskolar iha territoriu laran.

"Ida ne’e ami la konkorda tanba sei la fó benefisiu," dehan José.

Nia fó razaun, bainhira estudante sira lorloron konsumu de’it paun iha eskola, sira bele lakohi haan ona produtu lokal bainhira fila ba uma.

Aleinde ne’e, nia dehan, orsamentu ne’ebé governu aloka kada tinan ba merenda eskolar ho total millaun $6 ne’ebé bele fó benefisiu ba agrikultór sira sei ba hotu ONG internasionál.

"Se karik asina MoU ho Care entaun osan hirak ne'e sei aloka hotu ba organizasaun refere mak sei utiliza. Ida ne’e sei iha implikasaun, konserteza Timor Leste la promove ona produtu lokal iha rai laran, hodi depedensia nafatin ba produtu hirak husi li’ur,” dehan nia.

“Bainhira organizasaun Care introdus paun keju entaun buat hotu sira mak halo, hein distribui de’it ba iha eskola sira iha territoriu laran,” nia hatutan.

Read 823 times
Rate this item
(0 votes)
MidAd1