Koordenadór Pilar VII Covid-19 Nilton do Carmo da Silva hateten, pasiente ho idade 39 ho sexu mane ne’ebé viajén husi Indonézia mai to’o Dili iha loron 13 fulan Setembru no halo konfinamentu obrigatóriu iha fasilidade sira ne’ebé governu prepara, no halo teste swab iha loron 23 fulan Setembru no hetan rezultadu konfirmadu pozitivu iha loron 28 fulan Setembru ne’e hahu baixa iha sala izolamentu Vera Kruz ho kondisaun leve.

“Teste Swab ne’ebé halo iha loron 02 fulan Outubru ne’e hatudu rezultadu negativu,no iha loron 05 fulan Outubru ne’e teste konfirmativu hatudu rezultadu negativu, tanba ne’e maka ohin loron hakarak deklara ba públiku katak pasiente refere sei alta ohin” dehan nia iha konferensia imprensa iha Vera Kruz, Kuarta (07/10).

Nia hatutan katak,pasiente refere sei nafatin kumpri autokuarentena ba loron 14, no hetan kontrolu regular husi autoridade vizilánsia epidemolójia Ministériu Saúde nian.

Tuir dadus Ministériu Saúde (MS) nian to’o iha loron 07 fulan Outubru ne’e, total ema halo teste laboratóriu hamutuk 8306, sira ne’ebé hein rezultadu hamutuk 272, no sira ne’ebé rezultadu teste negativu hamutuk 8006. Total kumulativu kazu konfirmadu 28. Ba sidadaun sira ne’ebé maka agora dadaun halo konfinamentu obrigatóriu hamutuk 262 no sira ne’ebé halo autokuarentena hamutuk 407 no total pasa kuarentena durante loron 14 hamutuk 4700.

Ministériu Saúde (MS) nafatin apela ba komunidade sira atu kumpri medidas preventivas sira, fase liman bebeik, mantein distansiámentu sosiál no uza maskára atu bele hadook an husi moras Covid-19.