Segunda, 14 Outubru 2019 | Login
Povu Timor forma atu ba vota iha loron 30 Agostu 1999. Foto EDDY HASBY (KOMPAS) Povu Timor forma atu ba vota iha loron 30 Agostu 1999. Foto EDDY HASBY (KOMPAS)

TL Hakarak Hatudu ba Mundu Rai Rahun no Suar Laiha Ona iha Loron Konsulta Popular Featured

DILI: Iha komemorasaun loron Konsulta Popular ba tinan ida ne’e, Timor Leste hakarak hatudu ba mundu internasionál katak kondisaun nasaun foun ne’e la hanesan ona ho tinan 20 liu ba ne’ebé nakonu ho rai rahun no ahi-suar.

Iha 30 Agostu tinan ida ne’e, Timor Leste sei komemora loron Konsulta Popular ne’ebé sai nu’udar loron importante ba Timor-oan sira hodi deside ninia futuru.

Hafoin tinan 20, Timor Leste hakarak hatudu nia “oin” ne’ebé diferente ho Timor Leste iha tinan 1999.

Atu bele atinze ida ne’e, Governu Aliansa Mudansa ba Progresu (AMP) esforsu hodi organiza komerasaun loron istoriku ne’ebé sei hetan partisipasaun husi bainaka sira husi nasaun seluk atu bele la’o ho susesu.

Ba tinan ida ne’e, Komemorasaun Loron Konsulta Popular sei hala’o iha area Tasi Tolu, Dili.

Ministru Administrasaun Estatal Interinu Abílio Jose Caetano husu ba komunidade hotu-hotu atu fó kontribuisaun hodi hadia no hamoos ida-idak nia hela fatin hodi fó impresaun di’ak ba bainaka sira ne’ebé sei mai hola parte.

“Tanba iha loron 25 ba oin bainaka sira sei mai partisipa (komemorasaun Loron Konsulta Popular) hodi fó impresaun ba sira katak uluk iha tinan 1999 haree rai rahun no suar, depois  tinan 20 haree ita rain iha dezenvolvimentu, progresu no sidadaun moris hakmatek,” dehan Ministru Abilio iha Tasi Tolu, Sesta (26/07).

Konsidera ba importansia husi loron ida ne’e, Primeiru Ministru Taur Matan Ruak liu husi enkontru Konsellu Ministru fó orientasaun ba Ministériu hotu-hotu atu foku ba area Tasi Tolu.

Iha Sabadu (27/07), PM Taur tuun direitamente ba Tasi Tolu hodi haree preparasaun ne’ebé hala’o ona.

“Ha’u esplika ba Primeiru Ministru katak sei harii tenda tolu ba serimónia ofisial 30 Agostu,  no prepara fatin VIP, no fatin parkiran, no hadi'a fatin sira atu evita rai rahun,” dehan Ministru ne’e.

Aleinde ministériu sira, instituisaun defeza no seguransa, F-FDTL no PNTL, tuun mós ba area Tasi Tolu hodi halo limpeza.

Read 1135 times Last modified on Tersa, 30 Jullu 2019 13:44
Rate this item
(0 votes)
MidAd1