Enkuantu tuir estimasaun husi World Health Organization (WHO) no Ministériu Saúde kada loron populasaun Timor mate na’in tolu (3) too na’in haat (4) tanba moras tuberculose.

“Maioria TBC pulmonáriu tanba infeksaun makrobakteria tuberculose iha pulmaun ha’u bele dehan katak kuaze 90% ne'e TBC pulmonáriu hotu no 10% mak pasiente ho extrapulmonáriu TBC ruin, TBC kakutak no TBC parte seluk tan,” dehan Diretór Klinika Dr. Daniel Murphy, Inacio dos Santos ba Online INDEPENDENTE, ohin iha nia knaar fatin.

Tuir nia katak, pandemia Covid-19 bele fó ameasa ba mundu no hamate ona ema barak iha tinan ida nia laran, maibé seidauk hamate ema ida iha Timor-Leste. Tanba ne’e, nia afirma katak, iha Timor tuberculose risku liu Covid-19.

"Maibé ita nia boot sira la hakfodak kona ba ida ne’e, ita boot sira imajina Covid tama mai seidauk oho ema ida ema hakfodak hotu, tanba Covid ne'e ba ema kiik no ema boot hotu, ba ema riku no ema kiak hotu maibé TBC ne'e lae barak liu ho ema kiak sira,”dehan Diretór klínika ne’e.

Kontribui ba tuberculose ne'e maka má-nutrisaun, ema sira ne'ebé nutrisaun menus, liliu labarik kiik sira mak má-nutrisaun, ema adultu sira ne'ebé má-nutrisaun ne’e sira iha risku.

"Entaun ema sira ne'ebé kiak han hemu ladún di'ak iha uma laran entaun sira ne'e iha risku ba moras TBC,"nia esplika.

Klinika ne’e rejista maioria adultu mane (idade liu) pursentu 70 (70%), tuir mai feto no labarik sira pursentu 5. TBC ba labarik sira barak liu tranzisaun husi inan-aman sira ne'ebé pozitivu ho kaben tasak no balun ho TBC ruin.