Xefi Estadu integra medalla orden de méritu ba Jornalista Diáriu Nasionál, Antónia Maia Soares Gusmao alias ‘Mate Moris’ hodi reprezenta jornalista tomak.
Eis Komandante fitun rua ne’e agradese durante tinan lima hala’o knaar nu’udar prezidente vizita ba haree problema no sofrimentu povu iha suku 442, Postu Administrasaun 65 no Munisípiu 13, jornalista mós hikis kosar no sai sasin la’o sa'e tun foho hodi deskreve istória kona-ba problema sosiál, sofrimentu terus ne’ebé povu enfrenta publika iha média imprime no eletrónika.
“Iha ha’u iha mandatu, ha’u privilejiadu boot ida ke ita boot sira (jornalista) akompaña ha’u, ha’u koñese de’it ai laran mais, la koñese vila, mais ohin ha’u agradese imi halo fatin sira iha Timor laran ne’ebé ema barak la koñese, ohin ema barak bele koñese. Tanba ne’e ha’u orgullu fó sertifikadu ne’e para rekoñese imi nia servisu,” dehan iha Palasiu Prezidente, Kinta (11/05).
Taur dehan, haree ba valór servisu ne’ebé jornalista produs boot liu fila plaka (serfitikadu) ne’ebé jornalista sira simu. Tanba mezmu durante la’o hikis kosar hasoru problema, maibé jornalista iha fuan boot akompaña vizita PR.
“Ha’u konsidera imi nia sakrifisiu dedikasaun no vontade ne’e hodi la’o akompaña ha’u la’o ho fuan no laran,” nia apresia.
Entretantu Taur dehan, durante funu, jornalista nasionál no internasionál barak halo atividade jornalizmu nian servisu fó sai informasaun kona-ba prosesu luta gerrilleiru FALINTIL fó sai ba mundu.
Taur dehan iha tempui funu laran, bainhira sira rona notísia ruma fó sai iha radiu ho lian Inglés fó sai kona-ba TL nia luta, sira hotu iha ai laran kontente bidu ho haksolok hodi luta nafatin.
“Iha ita nia istoria durante funu ita hotu sente forsa notisia no forsa informasaun nian. Ami iha ailaran iha dekade 80, rona Timor-Leste nia situasaun atraves radiu, dala barak ami bidu too duut sira mate tanba kontente katak, ita la mesak, Timor nia ema sei ko’alia, mezmu ami la komprende lian Inglés, maibé soldadu too ami sira boot ne’e mós bidu ho haksolok,” Taur konta hodi fó lembra.
Durante funu, Taur dehan nia ho Maun, Xanana, David Alex, Konis Satana hasoru malu ho jornalista barak hodi halo entrevista konta kona-ba Timor nia luta too hetan vitória.
Taur dehan, provas kona-ba reportajen boot ida ne’ebé jornalista Dominike halo filmajen mak operasaun tiru malu ho TNI iha Asadaitula nian no fatin seluk tan.
“Ami ba tiru malu iha Asaidatula ami lori nia (jornalista Dominike) ba halo filme, maski nia ta'uk loos,” Taur konta.
Tanba ne’e, Taur dehan papél jornalista importante tebes hodi rekolla informasaun hodi habelar ba públiku tomak kona-ba realidade akontesimentu ida.
Nia hatutan, jornalista iha tempu agora sai fali hanesan inimigu boot ba ukun nain sira, tanba jornalista fó sai informasaun kona-ba buat ne’ebé lider sira halo.
Ezemplu hanesan akontesimentu iha nasaun belun Brazíl, média halo ataka makas ba Eis Prezidente Lula, nune’e mós haree fila fali ba nasaun demokrasia hanesan iha Amérika, Prezidente Amérika, Donald Trump ladún iha relasaun di’ak ho jornalista sira.
Preokupa PM Rui Lori Jornalista Ba Tribunál
Nune’e mós, haree fila fali kontestu TL, PR Taur preokupa, Primeiru Ministru Rui Maria de Araújo komesa lori ona jornalista balun ba Tribunál.
“Iha Timor primeiru ministru mak lori ona imi ba tribunál,” Taur preokupa.
Nune’e mós iha Singapura, Taur dehan, Eis PM Singapura, Lee Kuan Yew hatama jornalista barak ba tribunál too selu multa lubuk ida hodi hatún sira nia produsaun ezemplár jornál nian.
Haree ba referénsia problema hirak ne’e, Xefe Estadu dehan, iha TL presiza ona jornalista ida ne’ebé iha kualidade profisionalizmu atu hakerek notísia ho balansu no verifika ho modelu investigasaun para foti dadus atu fó sai sai notísia labele halo risku ba ema seluk no risku ba média rasik.
“Mezmu iha problema sira hanesan ne’e, ba ha’u jornalista sira kontinua nafatin hanesan papél ida ne’ebé tenke fó sai lia loos,e ema hateten, faktu ida, imajen ida vale liu liafuan rihun ida,” Taur afirma.
Antónia Simu Orden de Méritu
Entretantu Xefe Estadu Taur integra mós medalla méritu ba Jornalista Grupu Média Nasionál (GMN), Antónia Gusmão ne’ebé sai nu’udar jornalista úniku ne’ebé akompaña vizita PR ba suku 442 no hasoru dezastre monu too moras tenke hetan asisténsia tratamentu saúde.
“Ha’u ohin fó kondekora ba alin feto (Antónia), ha’u bolu ‘mate moris’, reprezentante imi hotu imi jornalista hotu nian, tanba ha’u intersionadu loos ba ninia atitude ida. Ami la'o suku Suku Nama-nei mai iha Suku Assa, nia monu tenke tau soru,” taur konta.
Taur hatutan, saida mak jornalista Antónia halo ne’e sai hanesan referénsia ba jornalista sira seluk atu luta ho sakrifisiu hanesan mós jornalista sira ne’ebé luta ba TL too mate.
Iha fatin hanesan, Jornalista Antónia hato’o agradese ba PR Taur hodi integra prezente osan mean ne’e.
“Ha’u pesoalmente lori naran Diáriu Nasionál hato’o agradese ba PR Taur ne’ebé ohin entrega medalla méritu ne’e mai ha’u hanesan orgullu boot ba ha’u no kolega jornalista sira hotu,” ‘Mate Moris’ agradese.
Entretantu PR Taur iha oportunidade ida ne’e, entrega mós sertifikadu re koñesimentu ba jornalista média imprime no eletrónika hosi nasionál no internasionál hamutuk na'in 60 liu.
Média sira ne’e kompostu hosi, TVTL, RTL, STL, Timor Post, Diáriu INDEPENDENTE, Timoroman, Jornal Grupu Média Nasionál, Tempu Semanál, Mata Dalan, Radio Timor Kmanek (RTK), Radio Timor Leste (RTL), Radio Liberdade, Radio Voz, TVE . No hosi média internasionál maka, EPA, REUTER, LUCA, AFP no AP.
PR hato’o agradese ba media nain sira hotu iha Timor-Leste ne’ebé orienta ona ninia jornalista hodi asiste ninia viazen tomak durante tinan lima too remata.
Taur dehan, notísia hotu ne’ebé jornalista sira hakerek kona-ba problema suku 442, Gabinete Prezente Repúblika rekolla no hakerek ba dokumentasaun hodi rai ba futuru estudante sira bele halo estudu komparativu.
“Dokumentu hotu hosi suku 442 agora agora sai iha arkivu, ohin seidauk iha folin, maibé iha tinan 20 mai dokumentu ne’e sei iha nia folin boot,” tenik PR.
Ikus Taur husu jornalista atu servisu ho profisionalizmu atu kontribui informasaun ba prosesu dezenvolvimentu TL nian.