Stok Foos Menus, Armajen Nasionál Hela Tonelada 196 Featured

By Mariano Ronny Maiu 07, 2020 940
Sobu Fos iha Portu Dili. Foto INDEPENDENTE Sobu Fos iha Portu Dili. Foto INDEPENDENTE

DILI: Stock foos iha Sentru Lojistika Nasionál (CLN) hahú menus. Oras ne’e daudaun, iha armanzein hela tonelada 196, ne’ebé sei utiliza atu sustenta ba povu Timor-Leste tomak bainhira akontese kazu ruma.

Diretór CLN, Agustinho Junior Trindade hateten, antes ne’e iha stock tonelada 683, maibé tanba fó ona apoiu barak durante ne’e maka kuantidade fos hahú menus.

“Husi 196 tonelada ne’e mós agora ami halo ona distribuisaun para responde dadaun nessesidade husi komunidade sira, liuliu komunidade ne’ebé iha fatin fatin área izoladu presiza halo intervensaun ami halo,” dehan nia, iha knaar fatin, Mandarin, horisehik.

Nia relata, hahu husi Munisípiu Baukau CLN halo ona intervensaun, agora dadaun iha semana ne’e ho semana oin sei komesa tan iha Postu Laklubar, Atsabe, Bobonaro ida ne’e iha planu ona atu halo intervensaun.

Aleinde Munisípiu sira ne’e, iha mós pedidu ida mai husi Munisípiu Oekusi, Prezidente Autoridade RAEOA fó mai pedidu ida ho kuantidade bo’ot uitoan, entaun sua exelensia Ministru foin maka fó despaisu ida atu bele responde uluk foos saka rihun 1 ba Oekusi no mós Oekusi oan sira ne’ebé hela iha Dili ohin apoiu ona 200 saka ba sira.

“Ne’ebé atu hateten deit kata husi loron ba loron Stok foos komesa menus maibé hanesan ha’u dehan ona katak Governu esforsu maka’as tebtebes, esforsu maka’as tebtebes atu husi loron ba loron Stok nene’e nafatin estabel para bele apoiu komunidade sira”.

Antes ne’e mós halo ona intervensaun iha Munisípiu Baucau, Kovalima, Ermera, Lospalos katak pur nessesidade wainhira sira hatama pedidu CLN halo intervensaun, agora mós CLN sukat hela katak importante to’o kedas fatin rural ne’ebé susar para atu asesu transporta públiku sira, entaun CNL nia prioridade sementara fokus liu ba iha fatin fatin izoladu, tanba iha Dili ka iha fatin sira transporte movimentu di’ak hela nene’e kuaze la prioridade liu, maibé CLN tau atensaun se iha komunidade balu urjente presiza tenke fó apoiu.

“Ami fokus liu maka fatin izoladu sira, pur ezemplu foin dadauk ami iha Baukau, ita bele hare’e katak truk hirak ba kuaze mout loron tomak, mais komunidade sira nia apoiu, Xefe suku mós servisu maka’as tebtebes mai ajuda dada kareta ne’e, ne’ebé atu hatete katak ami komesa fó intensaun liu ba fatin Izoladu sira,” Dehan nia.

Mídia INDEPENDENTE rasik tenta atu intervista Prezidente CLN, Relasiona ho deklarasaun Govenu nian ne’ebé antes ne’e fó sai ona ba públiku katak planu atu importa ka sosa foos mai husi rai liur, maibé Prezidente CLN rasik seidauk bele fó komentariu kona-ba asuntu ne’e.

Rate this item
(0 votes)

Independente Digital TV