Sosiedade Sivíl Kontra Desizaun PN Sosa Karreta Foun Featured

By Jacinto Xavier Outubru 02, 2018 3270
Sosiedade Sivil Sosiedade Sivil

DILI: Parlamentu Nasionál liu husi Konsellu Administrasaun Parlamentár planeia atu sosa karreta foun 65 ba deputadu foun sira iha 2019. Sosiedade sivíl kontra makaas polítika ne’e tanba problema karreta Prado tuan seidauk rezolve.

Peskizadór Organizasaun Sosiedade Sivíl, Asia Justice and Right (AJAR) Inocêncio Xavier hatete, Parlamentu Nasionál halo ona planu atu tau osan sosa fali karreta foun ba deputadu 65 ne’e hatudu sira hatudu polítika inkonsisténsia.

Deputadu husi bankada governu no opozisaun ne’ebé inkilina-aan iha Konsellu Administrasaun Parlamentár hodi halo planu orsamentu hodi sosa karreta ba deputadu sira ne’e la onestu ba sofrementu povu nian.

Karreta Prado tuan ne’ebé halo ona leilaun ikus kansela fali sei iha hela prosesu laran, oinsá atu entrega hikas mai iha PN atu distribui fali ba deputadu V lejizlatura sira atu uza hodi halo servisu.

Osan ne’ebé uluk eis-deputadu sira uza halo leilaun karreta Prado devolve hotu ona, maibé sira kontinua lori karreta ne’e ba uma. Asaun ne’e hatudu momoos katak sira halo asaltu ba patrimóniu Estadu tama ona kategoria krime.

Tanba ne’e, loloos Komisaun Anti Korrupsaun (KAK), Providoria Direitu Umanu no Justisa (PDHJ) no Ministériu Públiku (MP) tenke koopera malu hodi husu ba Polisia Nasionál Timor-Leste (PNTL) atu bele foti direita iha sira nia hela fatin.

Ami husi organizasaun sosiedade sivíl sei fileira ida ho estudante sira husu ba Parlamentu Nasionál atu hapara planu sosa karreta foun 65”, dehan nia, iha knaar fatin, Faról-Dili, foin lalais ne’e.

Membru órgaun soberania haat ne’ebé uza karreta estadu kuandu mandatu remata hotu-hotu entrega hikas, úniku órgaun Parlamentu Nasionál maka kada períodu kuandu mandatu remata sasán sira ne’e lori hotu ba uma.

Sira-nia saláriu no regalias kada fulan bele atinje to’o rihun $5.000, maibé to’o mandatu remata sei privatiza nafatin sasán Estadu nian, ne’e hatudu deputadu kaan-teen, imorál no irresponsabilidade nu’udar reprezentante povu.

Ne’e duni, husu ba eis-deputadu sira ne’ebé oras ne’e seidauk entrega karreta ne’e tenke mai entrega fali ba Estadu atu deputadu eleitu sira uza karreta tuan ne’e hodi halo servisu.

Antes ne’e, Prezidente PN, Arão Nóe de Jesus, ameasa eis-deputadu III Lejizlatura ho polisia karik la entrega karreta.

Ne’e duni, PN seidauk deside atu sosa karreta foun ba deputadu sira, maibé desizaun final ne’ebé foti ona maka atu rekolla karreta tuan hafoin bele haree fali ba asuntu atu sosa karreta foun nian.

Nune’e, Sekretáriu Jerál PN, Adelino Afonso de Jesus hatete, PN liu husi Konsellu Administrasaun Parlamentár halo planu atu sosa karreta foun 65 ba deputadu sira, tanba ne’e sei orsamentu iha OJE 2019 ne’ebé tuir planu sei aprezenta iha Outubru nia laran.

Orsamentu akizasaun karreta ba deputadu sira ne’e sei ba hatama iha OJE 2019 nian” dehan nia.

Planu akizasaun karreta foun seidauk bele deside marka karreta no nia orsamentu montante hira mak atu prevé, hein diskusaun OJE 2019 nian.

Rate this item
(0 votes)

Independente Digital TV