SIJK: EE mak Bele Ajuda Governu Kontrola Fronteira Featured

By Elsa Belinha Maiu 21, 2020 2228
Dr. Sergio Lobo Dr. Sergio Lobo

DILI: Maske seidauk foti desizaun kona-ba estende Estadu Emerjensia (EE), maibé Sentru Integradu Jestaun Krize (SIJK) konsidera so ho EE mak governu bele kontrola movimentu iha area fronteira.

Hanesan públiku hatene, daudauk ne’e kazu pozitivu Covid-19 iha Timor-Leste laiha ona, maske nune’e, iha nasaun seluk, inklui nasaun ne’ebé besik liu TL, Indonezia, númeru infeksaun Covid-19 kontinua aumenta.

Ho nune’e, governu sei estuda no haree iha ka lae nesesidade atu estende tan Estadu Emerjensia ba dala tolu.

Ba kestaun ne’e, portavoz SIJK Sergio Lobo hatete, EE mak ajuda Ministériu Saúde (MS) hodi kontrola fronteira no hafasil MS kontrola sidadaun ne’ebé mak tama mai.

Lobo dehan, nasaun vizinu sira hanesan Indonezia no Australia númeru kazu konfirmadu Covid-19 sei aumenta, maibé seidauk iha desizaun hodi estende EE.

Molok ne’e, Primeiru Ministru Taur Matan Ruak deklara fó ona instrusaun ba SIJK atu halo levantamentu kona-ba Covid-19, hafoin fó sira-nia pareser atu kontinua estadu emerjensia ka lae.

“Ohin ha’u fó instrusaun ba sentru integradu jestaun krize atu halo levantamentu, fó sira-nia pareser kona-ba pasu saida mak fó, presiza halo extensaun (EE). Se presiza karik saida, la presiza karik medida saida mak tenke toma,” dehan PM Taur hafoin enkontru semanal ho Prezidente Repúblika Francisco Guterres Lu Olo iha palasiu Prezidensial, Aitarak-Laran, Segunda (18/05).

Tuir Xefe Governu ne’e, maske TL livre ona husi pozitivu Covid-19, maibé nasaun viziñu sira, liu-liu Nusa Tenggara Timur (NTT) iha ameasa boot Covid-19.

“Signifika preokupasaun ida ne’e boot, nune’e (SIJK) sira haree didi’ak atu nune’e ita prepara didi’ak ho estadu emerjensia bele hakbiit an atu responde ho nesesariu,” dehan nia.

Rate this item
(0 votes)

Independente Digital TV