Print this page
SEJD, Leovigildo Hornai ho Prezidente FFTL SEJD, Leovigildo Hornai ho Prezidente FFTL

SEJD Mediadór ba Problema FFTL Featured

DILI: Sekretáriu Estadu Juventude Desportu (SEJD) sei kria enkontru parte tolu entre klube futeból, Liga Futeból Amadora (LFA) no Federasaun Futeból Timor-Leste hodi buka solusaun ba problema ne’ebé futeból ne’ebé nasaun ne’e enfrenta hela.

Ne’e duni, oras ne’e daudaun SEJD halo ona kontaktu ho parte sira ne’e atu bele buka dalan oinsa solusiona problema ho di'ak.

“Trés partida ne’e atu rona parte hotu-hotu, depois atu fó solusaun ba kongresu no prosesu atu hadi'a federasaun ba futuru ne’e oinsá,” dehan Sekretáriu Estadu Leovigildo Hornai, iha Palasiu Governu, horisehik.

Nia hatutan, enkontru trés partida kontinua la’o nafatin hamutuk ho klube futeból sira, LFA no FFTL hodi rona parte hotu-hotu.

“Ha’u ko'alia ona ho Prezidente Futeból Timor-Leste nian, ha’u mós ko'alia ona ho klube sira no prezidente LFA nian, para depois hodi haree asuntu ne’e”, tenik nia.

Aleinde ne’e, nia dehan, realiza enkontru para atu mai rona malu. Maibé enkontru sei barak para atu haree problema ne’e.

Governu nafatin hola nia pozisaun atu hateten katak, buat hotu tenke liu husi enkontru para bele iha solusaun.

Liga lokál konsege organiza di'ak ona, maibé agora tenke hasoru fali dezafiu foun tanba Timor-Leste labele joga iha eventu formál sira iha rejiaun ne'e.

Federasaun Futeból Timor-Leste (FFTL) ofisialmente hetan blacklist husi FIFA husi Asia Football Confederation (AFC) hodi labele partisipa jogu iha Kopa Ázia nian to'o tinan 2023.

Sansaun ne'e FIFA hatún tanba identifika FFTL halo falsifikasaun dokumentu ba jogadór Brazileiru na'in 12 ne'ebé halo naturalizasaun, maibé ho karakter falsifika sira nia dokumentu hodi sai hanesan timoroan.

Nune’e antes ne’e, SEJD realiza ona reuniaun trés partida, maibé la koopera husi FFTL tanba sira lakohi atu Governu envolve-aan iha problema federasaun nian.

Maski nune’e, iha primeiru reuniaun ne’e Governu sei tolera auzénsia FFTL nian, maibé ba oin mak kuandu la partisipa nafatin Governu sei medida tuir ninia kompeténsia.

Tanba tuir lei baze desportu nian fó dalan ba Governu atu fó xamada ba federasaun ne’ebé jere la tuir estatutu.

Entretantu, tuir karta ne’ebé FFTL hasai, sira deside la partisipa iha enkontru trés partida tanba FFTL halo tuir de’it ninia estatutu no estatutu AFC-FIFA nian.

FFTL konsidera reuniaun ne’e hanesan julgamentu populár hasoru FFTL, tanba ne’e sira deside hodi lakohi partisipa.

FFTL rasik seidauk preparadu atu halo kongresu estraordináriu. Tanba ne’e, FFTL sei kontinua nafatin hala’o sira ninia funsaun hanesan baibain. 

Read 2504 times Last modified on Kuarta, 22 Fevereiru 2017 11:07
Rate this item
(0 votes)

About Author

Latest from Domingos da Costa

Related items