“Fós folin sae impaktu husi ró Nakroma ho kapasidade tula sasan limite tebes ba ema sira ne’ebé ba foti sasan, husi Dili mai, entaun sasan folin sae,”dehan Negosiante Fernando de Souza Nekat, ba INDEPENDENTE, iha Merkadu Numbei Oecusse, sabadu 25/07/2020.

Negosiante ne’e subliña, dadaun ne’e fós 25kg folin sae ba $16 too $18 dollar Amerikanu no 20kg sae ba $14 too $16 dollar Amerikanu. Folin fos antes, 25kg folin $12 no 20kg $12.

“Ami sujere ba governu atu hadiak lalais ka aumenta tan ró ahi ne’e par bele hatama sasan barak hodi normaliza fila fali folin sira ne’e,”dehan nia.

Nia akresenta tan, folin sae laos ba fos de’it maibé masin midar mós folin sae saku ida sae ba $31 dollar Amerikanu enkuantu folin anterior kada saku ho folin $27 dollar Amerikanu.

Entertantu Deputadu husi Bankada Partidu Demokratiku iha Parlamentu Nasional, Mariano ASSANAMI Sabino hateten, preokupasaun povu Oekusse nia sei hatoo ba ministériu relevante bainhira fila ba Dili.

“Ha’u hanoin fós folin sae, mina folin sae hanesan problema ne’ebé maka RAEOA hasoru ne’e problema nasionál, tanba ita ho covid-19 ne’e ema labele liu husi terrestre ema hotu liu husi tasi, ró ida ne’ebé mak atu hola fos ho mina ne’e atan ha’u hanoin estadu tenke halo intervensaun lalais ba povu ida ne’e nia halerik,”dehan ASSANAMI.