Rezolusaun Governu, Ohin Hahú Bandu Sidadaun Husi Nasaun 147 Tama TL Featured

By Pedro Alves Marsu 19, 2020 2563
Bandeira Timor-Leste Bandeira Timor-Leste

DILI: Governu aprova ona rezolusaun ida hodi hahú ohin, Kinta (19/03), bandu sidadaun husi nasaun 147 tama mai Timor-Leste.

Tuir dadus husi Organizasaun Saúde Mundial (OMS) to'o ohin loron nasaun 159 mak afetadu ona Covid-19.

Rezolusaun ne’e foti liu husi reuniaun Konsellu Ministru (KM) ne'ebé hala'o iha Kuarta (18/03).

Ministru Reforma Lejislativa Asuntu Parlamentar (MRLAP) Fidelis Leite Magalhaes informa, KM aprova ona rezolusaun ida hodi bandu sidadaun husi nasaun 147 ne'ebé afetadu ona Covid-19 atu labele tama Timor-Leste.

Rezolusaun ne'e, tuir Fidelis sei aplika durante fulan ida nia laran hafoin governu bele halo fila fali revizaun.

Aleinde bandu sidadaun husi nasaun afetadu sira, bandu no aplika mós estradisaun ba ema sira ne'ebé iha semana haat kotuk liu ba vizita no transit ona iha nasaun sira ne'ebá afetadu Covid-19.

"Aprova atu bandu no aplika estradisaun ema sira ne’ebé iha semana haat kotuk liu ba vizita no transit ona iha nasaun sira ne’ebé organizasaun saúde mundial rekoñese rejista ona kazu covid-19, sira ne'e la permite ona atu tama husi aviaun ou rai maran mai teritoriu nasional," deklara Ministru Fidelis iha palasiu governu, Kuarta (18/03).

Rezolusaun ne'e, nia hatete, la aplika ba sidadaun nasional no ba sidadaun estranjeiru ne'ebé moris iha TL.

"Ba sidadaun nasionál bele mai nafatin ita-nia rai laran, ba sidadaun estranjeiru ne'ebé mak moris iha teritoriu nasionál bele mai nafatin rai laran," dehan Fidelis.

Aleinde ne'e, Fidelis dehan, bainhira iha kazu fundamentu duni ne'ebé iha relasaun ho interese nasionál, Primeiru Ministru bele autoriza ema estranjeiru husi nasaun afetadu Covid-19 tama TL.

“Presiza loke dalan atu sira tama mai iha Timor Leste. Ezemplu  hanesan se ita presiza espesialista husi Xina atu mai ajuda, ita tenke loke dalan sira tama maske sira-nia nasaun rejista Covid-19,” nia dehan.

Rate this item
(0 votes)

Independente Digital TV