Rede Feto: Kazu Insestu Akontese iha Timor Laran Tomak Featured

By Camilio de Sousa Janeiru 07, 2021 1892
Diretora Rede Feto, Aida Exposto Diretora Rede Feto, Aida Exposto

DILI: Diretora Rede Feto,Aida Exposto relata katak kazu insestu laos akontese de’it iha Munisipiu ida maibé akontese iha Timor laran tomak.

Maski nunee, laiha familia ida mak hatoo keixa tanba konsidera kazu ne’ebé sira enfrenta hatun sira nia dignidade.

“Tinan kotuk 2020 Rede Feto hala’o atividade advokasia ba insestu iha Munisipiu Ainaro ba labarik feto insestu sira hanesan na’in ida iha Suku Mau Ulo, na’in ida iha Suku Mulo Maubesi no na’in ida seluk iha Suku Manoloba,”dehan nia ba online INDEPENDENTE.

Entertantu iha MuniSipiu Lautem Rede Feto mós halo ona advokasia ba labarik insestu ida iha Posto Lautem Suku Maina. Ida seluk iha Iliomar Aldeia Ililai, total kazu ne’ebé Rede feto durante hala’o  advokasia iha 2020 hamutuk kazu insestu (5) maibé la kontinua prosesu tuir lei tanba rezolve kedan liu husi dalan tradisionalmente,"dehan Diretora ne’e.

Nia hateten, númeru insestu sei kontinua ezizte tanba Parlamento Nasionál sedauk halo lei hodi kriminaliza aktus hirak ne’e.

Tanba ne’e, Rede Feto konsidera hanesan nivel prioridade no urijente ne’ebé sai hanesan indikador katak iha 2022 -2023 Ministério Justisa tenke produs ona lei kona-ba kazu insestu.

Governu mós tenki kria sala separadu no fatin akonselamento ne’ebé seguru ba vitima sira baihira atu tuir julgamento iha Tribunál.

Rede Feto rekomenda ba Parlamento Nasional  liu husi Komisaun F atu asseleira esbosu lei kazu insestu nomos rekomenda ba Guverno liuhusi Ministerio Justisa  tenke halo amandamento ba kodigu penal hodi hamosu artigu espesifiku kona-ba kazu insestu no tenke halo separasaun ba suspeitu husi kasu insestu no omisidiu durante iha prizaun.

Sosiede Sivil liliu Rede Feto kontinua monitoriza no advokasia ba Ministériu Justisa no Parlamento Nasional kona-ba asuntu ne’e.

Rate this item
(0 votes)
Last modified on Kinta, 07 Janeiru 2021 17:29

Independente Digital TV