Prezidente Lú Olo Promulga DOT Featured

By INDEPENDENTE Agostu 13, 2018 3346
Prezidente Repúblika Francisco Guterres Lú Olo Prezidente Repúblika Francisco Guterres Lú Olo

DILI:  Prezidente Repúblika Francisco Guterres Lú Olo promulga ona dekretu Parlamentu nasionál (PN) númeru 1/V kona ba autorizasaun PN ba VIII Governu konstitusionál atu foti Dotasaun Orsamentu Temporaria (DOT) tokon $140 husi fundu petrolíferu.

Osan ne’e atu finansia mákina estadu repúblika Demokrátika Timor Leste (RDTL) ba Fulan-Jullu no Agostu 2018.

Promulgasaun ne’e, liu husi dekretu Prezidensiál bazeia ba konstituisaun RDTL artigu 85  alínea a no artigu 88 ne’ebé fó autorizasaun estraordináriu ba dekretu parlamentu nasionál nú 1/V atu halo transferénsia husi fundu petrolíferu.

Molok ne’e, Tribunal Rekursu hasai ona ninia desizaun ba dekretu PN nú.1/V katak dekretu ne’e la inkonstitusional.

Iha 30 Jullu 2018, Prezidente Repúblika Francisco Guterres Lu Olo hato’o pedidu ba Tribunal Rekursu atu halo fiskalizasaun ba dekretu PN nú.1/V ne’ebé autoriza VIII Governu hodi foti orsamentu estraordinariu husi fundu petroliferu.

Prezidente Repúblika liu husi nia pedidu fó prazu loron 10 ba TR atu halo fiskalizasaun ba Doasaun Orsamentu Temporaria (DOT).

Prezidente TR, Deolindo dos Santos informa, hafoin simu pedidu husi PR Lu Olo, iha 31 Jullu TR hato’o notifikasaun ba PN no Ministériu Públiku ho prazu loron haat (4).

Iha Sesta semana kotuk (03/08) tuku 18.00, Deolindo dehan, PN haruka sira-nia resposta ba TR no iha Segunda (06/08) TR hahú hala’o ninia servisu.

Desizaun ne’ebé TR foti, Deolindo dehan, bazeia ba Konstituisaun no nu’udar desizaun koletivu.

“Desizaun sai mak ne’e dehan katak tuir Tribunál Rekursu nian katak laiha inkonstituinalidade, kestaun ikus ne’e mak dekretu ne’e rasik. Desizaun ne’e rasik horseik (Kinta, 09/08) ami haruka kedas ba Prezidente Repúblika Francisco Guterres Lú Olo,” informa PTR ba jornalista sira iha Tribunál Rekursu Kaikoli, Dili, Sesta (10/08).

Aleinde haruka ba PR Lu Olo, nia hatutan, TR mós notifika ba parte sira hanesan Prokurador Jeral Repúblika, Parlamentu Nasionál, no Governu.

“Tuir mai ne’e fila fali ba kompetensia Prezidente Repúblika ninian, ne’e Konstituisaun mak hatete. Prezidente atu veta ka promulga ne’e kompetensia Prezidente Repúblika nian laos kompetensia Tribunál Rekursu nian ona,” nia hatete.

Rate this item
(0 votes)

Independente Digital TV