Posibilidade Estabelese Governu Rejionál Featured

By INDEPENDENTE Agostu 16, 2017 2175
Palacio Governu Palacio Governu

DILI: Polítika partidu mais votadu, FRETILIN, atu desentraliza servisu hodi hakbesik governu ba iha povu, posibilidade sei hamosu governu rejionál ne’ebé estabelese iha fatin haat.

Tuir fonte prinsipál iha partidu FRETILIN hateten katak, iha kampaña polítika kompromete ona atu muda polítika governu nian hodi bele garante kualidade servisu hotu-hotu. Ne’e duni, iha ona planu atu hamosu governu rejionál ne’ebé lidera husi membru governu ida.

“Karik bele koloka membru governu ba rejiaun ida-idak hodi bele halo jestaun ba projetu boot sira iha distritu no aselera dezenvolvimentu di'ak liu”, dehan fonte ne’e, horisehik.

Hamutuk rejiaun haat mak planeadu atu estabelese membru governu hanesan Rejiaun Leste, Sentrál, Súl, Norte, inklui Oekusi.

Polítika ne’e FRETILIN opta hodi aselera dezenvolvimentu nasaun ne’e nian iha tinan tolu (3) nia laran.

Maski nune’e, polítika governasaun ne’e seidauk serteza, tanba sei aprezenta ba diskusaun ho partidu polítiku sira ne’ebé FRETILIN konvida hanesan Partidu Libertasaun Populár (PLP) no Partidu Kmanek Haburas Unidade Nasionál Timor Oan (KHUNTO) hodi bele diskute hamutuk, Kuarta (16/8), ohin.

Entretantu, Vise-Prezidente PLP, Fidelis Magalhães hateten, sira preparadu ona intermus polítika hodi partisipa iha diskusaun ne’e.

Maski nune’e, nia dehan, PLP laiha estratéjia polítika ruma ne’ebé atu aprezenta iha diskusaun ne’e, tanba husi parte sira nian atu rona saida mak partidu mais votadu, FRETILIN, sei aprezenta.

Antes ba iha diskusaun plataforma governasaun, Konselleiru partidu KHUNTO, José dos Santos ‘Naimori’ halo reuniaun ho Prezidente PLP, Taur Matan Ruak, iha Metiaut, Tersa (15/8), horisehik.

Rate this item
(0 votes)

Independente Digital TV