Komandante Unidade Espesial Polisia (UEP) Superintendente Xefe Afonso dos Santos informa, iha Tersa (23/07) tuku 6 dader, ekipa intelijensia UEP na’in tolu konsege kaptura suspeitu JS ne’ebé subar iha aldeia Lauva, Suku Riheu, Postu Administrativu Ermera, Munisipiu Ermera.

Hafoin kazu Leorema akontese, iha 4 Jullu lokraik, ekipa PNTL koko atu kaptura suspeitu maibé la konsege tanba suspeitu halai ba subar iha area jurídiku Munisipiu Ermera.

Hafoin prosesu buka tuir nia ain-fatin durante 19, ikus mai ekipa intelijensia EUP konsege deteta suspeitu ne’e nia paradeiru.

“Ha’u fó orden (ba membru intelijensia UEP na’in tolu) atu deteta didi’ak suspeitu ida ne’e ninia paradeiru hodi halo kapturasaun,” dehan nia.

Ho nune’e, hafoin identifika JS nia subar fatin, iha 23 Jullu tuku 4.00 dader nakukun ekipa intelijensia UEP serku suspeitu nia fatin, no iha dader tuku 6.00, ekipa ne’e konsege kaptura suspeitu.

Iha kapturasaun ne’e, ekipa mós konsege rekolla evidensia balun hanesan tudik ne’ebé suspeitu uza iha momentu akontesimentu.

“Tudik ida ne’ebé iha akontesimentu ne’e nia lori, nia mós rekoñese katak nia halai kuaze loron haat, foin mak to’o iha Ermera no nia deklara katak nia sunu uma no tuda inklui koñese mós suspeitu sira seluk,” dehan Komandante UEP ne’e.

Hafoin kaptura, ekipa UEP intrega suspeitu ba Polisia Siéntifiku Investigasaun Kriminal (PSIK) atu bele halo investigasaun ne’ebé klean liu tan.

Entretantu, polisia detein suspeitu durante oras 72 nia laran molok lori ba tribunal hodi hala’o interogatoriu dahuluk.