Sexta, 18 Outubru 2019 | Login
Polisia kous hela bebe ne'ebe hetan sunu iha semiteriu Santa Cruz. Foto INDEPENDENTE Polisia kous hela bebe ne'ebe hetan sunu iha semiteriu Santa Cruz. Foto INDEPENDENTE

Polisia Buka Tuir Autor Sunu Bebé Featured

DILI: Polisia Nasional Timor Leste (PNTL) Munisipiu Dili husu ba komunidade sira atu fó informasaun (info) relasiona ho kazu ema soe no sunu mutuk bebé ida iha area Simiteriu Santa Kruz Dili, Kuarta (24/07).

Komandante Daruak PNTL Dili, Superintendente Asisitensia Euclides Belo hatete, kazu soe no sunu bebé la’os kazu ne’ebé fasil atu bele deteta lalais, tan ne’e, polisia presiza informasaun hotu-hotu hodi bele identifika suspeitu no halo kapturasaun.

Maske rekoñese defisil, maibé Komandante Daruak ne’e hatete, polisia sei serbisu maka’as ho meius hotu-hotu ne’ebé hodi bele kaptura suspeitu ba hahalok immoral ne’e.

“Polisia iha meius balun ne’ebé mak sei utiliza hodi buka tuir suspeitu, tanba suspeitu laos ema ida ne’ebé tuun husi lalehan mai hodi soe bebé, nia atu semo lakon ne’e laiha,” dehan Euclides ba jornalista sira iha Komando PNTL Dili, Kaikoli, Kinta (25/07).

Aleinde husu kooperasaun husi komunidade sira, nia dehan, PNTL Dili mós orienta ona Ofisial Polisia Suku hodi serbisu hamutuk ho autoridade lokal sira atu halo indentifikasaun ba ema ne’ebé soe bebé.

Entretantu, molok ne’e, komunidade sira ne’ebé hela besik simiteriu Santa Kruz hakfodak bainhira hetan bebé ida ne’ebé falun ho plastiku soe hela iha Kruz Boot semiteriu Santa Kruz. Bebé ne’e nia isin lolon ahi haan mutuk ona.

Xefi Limpeza Semitériu Santa Kruz, Domingos Fátima informa, maizumenus iha tuku 8:00 dader, bainhira pesoal ida raut aifunan ne’ebé kari iha Kruz Boot nia raut kona plastiku ida no raan sulin sai husi plastiku refere.

“Ami nia kolega ida, Adolfo Rodrigues, mak ba dasa iha Kruz Boot, nia raut ai-funan haree ba raut ho plastiku no raan kona nia liman, nia hanoin animal maibé haree ba ema, ain no liman kompletu”.

“Ami haree ba ahi haan hotu labarik nia husar, sira (ema ne’ebé soe) falun ho hena metan depois tau iha plastiku laran mak sira sunu,” sasin ne’e konta.

Read 697 times
Rate this item
(0 votes)
MidAd1