PM Taur: Kada Tinan Timor-oan “Fakar” Tokon $1.5 iha Bali Featured

By Pedro Alves Jullu 06, 2020 3000
PM Taur. PM Taur.

DILI: Tuir dadus husi embaixada Indonezia, Timor-Leste sai nu’udar nasaun datoluk ne’ebé vizita fatin turizmu sira iha Bali, Indonezia. Osan ne’ebé Timor-oan sira fakar iha ne’ebá mós la’os uitoan, kuaze tokon $1.5 kada tinan.

Dadus husi embaixada Indonezia ne’e halo Primeiru Ministru Taur Matan Ruak preokupa, tanba kuaze osan barak mak semo hotu ba rai li’ur.

"Embaixadór Indonézia horbainhira dehan ‘Timor terceiro lugar entermus turízmu bá Bali, tokon $1.5 kada tinan’. Ne’e sira ne'ebé normál, sira ne'ebé bá tan kumu isin dala ida $200,” dehan PM Taur iha salaun Auditoriu Xanana Gusmão, Ministériu Finansas, Aitarak-Laran, Sesta (03/07).

PM Taur dehan, maioria Timor-oan ne’ebé halo vizita ba Bali kada tinan nu’udar emprezariu.

Hafoin gasta osan iha Bali, Xefe Governu ne’e hatutan, sira fila mai Timor-Leste no ezije governu atu selu lalais sira-nia projetu.

“Depois hakilar governu dehan governu selu lalais," dehan PM Taur.

Taur hatete, loos katak investimentu setor privadu nian buka de'it lúkru, maibé nu'udar Timor-oan tenke investe iha nia rai rasik, la'ós depende de'it bá investór estranjeiru mak atu mai investe fali.

"Ha'u uluk Prezidente (Republika) ha'u dehan ba señór Oscar Lima ho Julio Alvaro, ‘ha'u mak Primeiru Ministru, (ha’u) la fó projetu bá imi na'in rua, (tanba) imi na'in rua tempu Indonézia kedas emprezáriu, imi na'in rua nia osan ne'e hira ona? fó fali serbisu ba Timor-oan hira?’”.

“Klaru ké ita komprende (emprezariu) ne'e buka lúkru, mais tembem por amor de deus, se o haluha o nia nasaun, o lori ba dezenvolve iha ne'ebá no mínimu e bom aproveitar. E bom que ita ko'alia hanesan ne'e bá ita-nia emprezáriu sira, problema hanesan ne'e medidas saida mak ita atu toma par ita fó konfiansa ba ema katak ‘ita-nia nasaun bele investe, ninia rain rasik nia bele investe, nia Timor-oan la investe, hanoin katak estranjeiru mak bele mai investe," dehan PM Taur.

Aleinde ne’e, PM Taur dehan, iha mundu modern, liu-liu iha setór ekonómiku, presiza investe iha rekursu umanu, kuiñesimentu sabedoria, abilidade no seluk tan, tanba setór xave hirak ne'e mak hanesan matéria prima komersiál nian atu bele promove produtu interinu brutu, no evita osan sai ba li'ur.

Rate this item
(0 votes)

Independente Digital TV