PM Taur Husu Membru Governu Evita Adjudikasaun Direta Featured

By Artur da Luz Setembru 19, 2018 2594
Primeiru Ministru Taur Matan Ruak Primeiru Ministru Taur Matan Ruak

DILI: Atu evita mosu korrupsaun no mal administrasaun iha Governu laran, Primeiru Ministru Taur, Matan Ruak, husu ba membru Governu hadook-aan husi prosesu fó projetu liu husi dalan adjudikasaun direta.

Xefe Governu hateten, korrupsaun iha Timor-Leste ne’e diferente iha instituisaun Estadu nian, tanba hatama ministru, vise-ministru ho sekretáriu estadu barak tebes, to’o ikus barak tama kadeia.

Tuir PM Taur, membru Governu tenke atensaun ba pontu importante rua. Ida mak adjudikasaun direta ho emerjénsia. Ne’e duni, membru governu sira tenke estuda regra ho lei sira atu prevene tama kadeia, nune’e emerjénsia tanba konseitu emerjénsia sempre inventa.

“Ha’u hanesan imi nia-Xefe no imi nia kondutór, ha'u aviza risku ba imi. Tamba ha’u aviza risku ba imi risku ne’e saida? Risku ne’e ita la tau atensaun bele ameasa provoka futuru nasaun nian la ba oin ou ita boot sira nia futuru maka la ba oin”, dehan nia, iha edifísiu Ministériu Finansas, horisehik.

Nune’e, Primeiru Ministru rasik lakohi atu depois remata mandatu Governu nian iha períodu tinan lima haree ka rona membru Governu hataan iha tribunál no tama kadeia.

Xefe Governu deklara, Estadu ne’e la’ós membru Governu ida nia, maibé iha povu ho nasaun ne’e nia-liman. Bainhira membru Governu komete kazu hanesan, Xefe Governu fó kulpa ba membru Governu no labele salva.

Ne’e duni, PM Taur kontinua toma atensaun ba ninia membru Governu sira tenke hanoin dala 100 molok foti desizaun ruma, bainhira foti la tuir regra maka risku rasik sei fila ba membru Governu sira.

Tanba ne’e, hakarak dezeja ba membru Governu tomak, la’ós de'it responsabilidade ba nasaun maibé ba família importante tanba barak maka garantia atu sustenta uma laran.

Iha oportunidade ne’e, Primeiru Ministru hakarak husu ba membru Governu sira tenke koopera malu atu governasaun ne’e susesu iha mandatu 2018-2023.

Rate this item
(0 votes)

Independente Digital TV