Rezolusaun rua ne’e aprejenta husi Primeiru Ministru Taur Matan Ruak ba Konsellu Ministru. Maski nunee, iha komunikadu ne’ebé Online INDEPENDENTE simu la sita kona-ba rajaun ezonerasaun ba Presidente RAEOA ne’e.

"Konsellu Ministru aprova projetu rezolusaun rua governu nian, ne'ebé aprezenta husi Primeiru Ministru kona-ba ezonerasaun ba José Luis Guteres no nomeia Arsenio Paixao Bano ba kargu Prezidente Autoridade ba Rejiaun Administrativa Espesiál Oe-Cuse Ambeno (RAEOA)", haktuir komunikadu imprensa Konsellu Ministru.

Presidente REAO sesante, José Luís Guterres, simu pose nu’udar Prezidente Rejiaun Administrativa Espesiál Oekusi Ambenu (RAEOA), husi Primeiru-Ministru, Taur Matan Ruak, iha loron 13 fulan-Novembru tinan 2019, iha Palásiu Governu.

Iha altura neba, Primeiru Ministru Taur Matan Ruak mak hatoo mós proposta rezolusaun ba Konsellu Ministru hodi nomeia José Luís Guterres, iha loron 6 fulan-novembru 2019.

Maibé tinan ida de’it ba José Luis Guterres lidera RAEOA, kuarta ohin PM Taur hatoo fali rezolusaun ida ba Konsellu Ministru hodi ezonera José Luis Guterres, no nomeia fali Arsenio Paixão Bano.

RAEOA ne’e harii iha tinan 2014 ho objetivu atu favorese dezenvolvimentu inkluzivu Rejiaun ne’e nian, no fó liu prioridade ba atividade sira ho karakter Sosioekonómiku hodi promove kualidade moris no moris-di’ak komunidade nian.