Primeiru Ministru, Taur Matan Ruak, iha konstrusaun Estadu, governu ida no ida tuun, ne’ebé sempre iha servisu kontinuidade, tanba dezenvolvimentu labele la’o ba kotuk maibé tenke ba oin.
Projetu 142 ne’e implementa iha governu anteriór, tanba ne’e presiza governu atu asume responsabilidade hodi rezolve tuir sistema orsamentál ne’ebé estabelesidu ona.
“Ba projetu 142 ne’ebé implementa ona ne’e governu sei selu, maibé sei haree didi'ak ida ne’ebé merese selu no ida ne’ebé la merese atu la selu”, dehan Xefe Estadu, iha Uma Fukun PN, Sesta (31/8).
Tuir nia, atu garante transparénsia no husu ba Parlamentu Nasionál atu halo inkéritu la’o hamutuk ho governu hodi haree ba kestaun dívida ne’e hodi rezolve.
Orsamentu Jerál Estadu (OJE) 2018 nian ne’e ba fulan haat, balun aloka duni atu selu dívida hodi iha orsamentu 2019 nian ne’e bele fokus ba halo dezenvolvimentu.
Iha fatin hanesan, Nelia Menezes, konkorda ho katak governu labele iha dívida, aat liu tan deve too tasi balun. Ne’e duni, aseita atu selu dívida sira ne’ebé akontese iha ukun sira liubá.
“Ha’u konkorda tenke selu divina ho respeita ba regra aprovizionamentu, regra finansas no regra formál sira seluk”, dehan nia.
Nune’e, nia mós konkorda harii inkéritu parlamentár hodi verifika obra sira ho baze kontratu ne’ebé akontese ona. Hafoin bolu pagamentu ho kualidade no tu’ir regra no lei ne’ebé vigora ona.
Nelia hatete, projetu 142 balun laiha kontratu sikat leet hela iha OJE 2018, haree iha livru 3A, pájina 30 kona-ba 60 projetu estrada munisípiu 12 implementa ona, maibé seidauk iha kontratu ho totál tokon $16.
